This page has been proofread.
Alla muntagna, alla muntagna!
Chi mè a chesa voul hoz rester?
Banduna veglia ta chera s-chagna,
Ve, la natüra a contempler!
Alla muntagna, alla muntagna!
Sün l'ot ho vita la liberted!
Simpl' ella truna sün la muntagna,
Püra, pürissma sco la vardet!
23 Avuost 1867.
Plövgia.
A guotta! chod; che chod nun eira
Nel ajer aunz ün cuort momaint;
E uoss' fras-chezza dutscha, chera,
Trasfuorma tuot in verd riaint.
Süls pros la povra erv' ardaiva
Als razs solers, chalur arsaint';
La plövgia lamma la beaiva
E tuot reviva per inchaunt.
Eau am chat tschanto in ma stüvetta,
Udind ils guots cruder sül tet;
Tel' ravaschia am daletta;
Il fras-ch guadagna eir mieu pet.
