This page has been proofread.
Pentecosta.
II spiert ais co, chi tres il muond s'fo via,
Ch'üngüna forza render po sogget;
Il spiert ais co, cha'l muond al tschel collia,
El truna liber sco etern vadret.
II spiert ais co, chi la s-chürdüna s-chatscha,
Chi rump' il giuf da tenebrus liam,
Ferm sco lavina, chi nel ot as stacha
E smanch' il god, sco füss ün flaivel ram.
II liber spiert ais co! Quaist di daresa
Sa glüsch divina tres il muond; ün pled
Da lod sincer s'adoza d'ogni chesa
La sencha psalmodia da liberted.
Il spiert del tschel ais co! A sa favella
Tremblé, vus glieud, a clera glüsch rebella!
1871.
Resüstaunza.
Clingian sains hoz »resüstaunza!«
Tres il muond vo quaist resun,
Pêsch portand e dutscha spraunza;
A tuots pövels redenziun.
