This page has been validated.
O glüsch dell' ota sfera,
Che voust a nus tü dir?
»Cha sü nel ot impera
Auror', etern sorrir!«
O glüsch, o glüsch zuond püra,
Che voust a nus predir?
»Cha sü nel ot ho dmura
La pêsch a tuot soffrir!«
O glüsch, o glüsch splendura
Aint in mieu cour bain cler!
Do'l pêsch in s-chüra ura;
Tü voust l'illüminer!
4 Favrer 1872.
In üna val.
Idillic lö, idol da mia amia,
Plaschaivla val, sorrir del paradis,
O verd' oasi d'pêsch ed armonia;
O quaunt serain passessan lo ils dis!
Il god antic coruna la verdüra;
Alpinas fluors favellan ün dutsch pled;
Dalöntsch dal muond in solitaria dmura,
Noss' orma dvainta tschel d'serenited.
