Che fest co auncha tü?
Il cling dels sains, chi sun' in la valleda
Tres il silenzi della s-chüra not,
Ais sco salüd dad ün' eted passeda,
Chi verda eira sco verdissem god.
Ais sco salüd dad ün amih chi parta
L'extrem salüd per nun turner pü co;
Ais sco il bütsch dad üna buocha zarta,
Chi aint nel cour chattet asil prüvo.
Ais sco resun dad algordaunza chera;
Sco il favler d'ün craunz da buns amihs;
Sco il svanir d'aurora püra, clera;
Sco il tramunt da spraunza sün bels dis.
E quel clinger, quell' armonia notturna
Reclam' in melanconic, dutsch momaint
Il champ da pos, silenziusa urna
Chi ais asil da pü d'ün cher paraint.
Memorisand usche chi bod spartiva,
Pü d'ün amih rechat chi nun ais pü
E bain desert' am pera quaista riva;
E am dumand: »che fest co auncha tü?«
Fin del 1881.
