Hest trent' ans? Bandun' amia,
Ils tramegls e lur dalet,
Lasch' il sot ed eir la gia,
Cumpr' impe ün s-chodalet!
1859.
Dalöntsch ün cher bainbod vain interro!
Perche suvenz nel cour ün led s'insinua?
Perche suvenz tristezz' ans chalcha zuond?
Perche suvenz nos ögl la larma bagna
E fraid desert ans pera tuot il muond?
Perche suvenz melesser ans guadagna
E nun savains ans dir bain la radschun?
Perche sorrir da festa nun s'allegra
E trist ans pera d'ogni sain il sun?
Que ais l'essenza, l'immortel' essenza
Qu'ais l'orma chi nel s-chür avegnir so ler,
Chi presentir so que chi bod arriva,
Que chi dolur zuond grand' ans voul piner.
Usche amih, cur tü dalöntsch spartivast
Füt attristo da greiv presentimaint,
Cha qualche cher dal muond cumio pigliaiva
Tres led, tristezza am gniva fat contschaint.
