gihapon kanato...
¿Nahinumdum ka? Mao kadtong gabhiuna... Gabii sa mga kalipay... Gabii sa mga paraeg. Gabii sa mga katawa, sa mga hudyaka, sa mga pahiyum...
¡O katam-is niadtong mga taknaa! Dili samahan!
... Apan ¿ngano bang gisulat ko pa man kining pahinumdum? ―ikaw dagway mangutana karon kanako sa ingon. Ug ako motubag: dayag na lamang aron dili mo ako hikalimtan, dili ikalubong sa kinahiladman sa imong mga kalimot; aron sa pagpahinumdum kanimo sa atong mga saad, Ben sa akong kalag ug bulak nakong pinili...
¿Nahinumdum ka? Palandunga... kay mao kadto ang atong mga kalipay.. Oo mao kadto sila, nga ikaw ngani, sa dihang managbulag na kita, paraygon uyamot, mihagawhaw kanako...
― Lauro: ¡katam-is sa atong mga takna!...
Ug unya gitubag ko ikaw:
―Dili pa mao. Labi pa unya kining matam-is kung dili baslan sa kasakit, dili dag-uman sa kasubo ang matagum langit sa atong Himaya...
Ug dayon natong panamilitay: ikaw misaka sa imong balay, ug ako mipauli sa akong Payag...
¿Nahinumdum ka?
Palandunga sa mahinay...
