Daing minaaging taon na dai sya minasabay sa romeria (54) sa Antipolo; kan panahon na ito duwang misa an saiyang linimosan sa dakol na ginigibo sa tolong novenario, asin dangan naparigos sa bantog na sapa, na pinagkakarigosan kaito kan mahal na ladawan. Nakikita pa nin tawong maki-Dios an mga gira kan bitis asin su mga ginoyodan kan buhok, asin gumabat nin sangribong tonelada. Minamawot nyamo na iwagwag kan makagigilantas na ladawan an saiyang sinanglitan na buhok sa mga mata kan mga devotong iniho asin batayan sinda sa dila okun sa payo.— Duman sa may burabod mansanang ito, sikat kumaon si Capitan Tiago nin inasal na lechion, sinigang na talosog na may kaibang mga dahon nin alibangbang asin iba pang mga masisiram na luto. May mga apat na gatos na pisos an saiyang ibinabayad sa duwang misang ito, alagad maluwas na barato kun hohorophoropon an ngoyaya kan Ina sa mga ruédang kalayo, mga cohetes, mga bomba asin morteretes okun bersos siring sa pagapod duman, kun iisipon an darakilang kapakinabangan na, salamat sa mga misang ini, makakamtan sa laog kan taon.
Alagad bako sanang sa Antipolo an kalongdan (55) kan saiyang matanog na devocion. Sa Binondo, sa Pampanga asin sa banwaan nin San Diego; kun may ibulang na manok na halangkaw an kasi minapadara sya sa cura nin kuwartang bulawan sa mga misas piciatorias (56) asin, siring kan mga romano nakikihumapot sa saiyang mga himarang, bago minatalad sa langtad nin labanan binobubodan an mga siwong sinanglitan, nakikihumapot man si Capitan Tiago sa saiyang mga himarang kaiba an mga pagbabakleng angay sa mga panahon asin sa mga bagong katunayan. Saiyang pinagmamasdan an laad kan mga kandila, an aso kan kamangyan, tingog kan padi, asin iba pa, asin sa gabos na ini saiyang hinihinguhang magalinaw an nagdadangadang na kapaladan. Sarong pinaniniwalaan na pagakala iyo na si Capitan Tiago bihirang madaog, asin ta ini minagikan sa pangyayari na paas su nagmimisang padi, kadikiton su mga ilaw, makuri su tagdo kan mga kandila okun may nakakasalak na bakong tunay na kuwarta, asin dakol pang iba: pinagsasabihan syang gayo nin sarong celador nin sarong cofradia na
