♣♣♣
Dein nus aunc ina gada ina quorta egliada sin nies document, sche vesein nus, che quel ei elaboraus cun gronda stenta e, schi lunsch sco nus savein giudicar, cun tutta pusseivla obiectivitad. Igl auctur sefundescha sin veglias, senza dubi verdeivlas fontaunas, cunzun las scartiras da P. Maurus Cathrin, ch' ein, sco ei vul parer a nus, buca stadas enconuschentas agl auctur della „Synopsis“.
Ei seresultescha ord quei document — cuntrari alla historia entochen dacheu —, che la bulla da Papa Urban VIII seigi, entras in sbagl cun il diplom dil doctorat de Avat Adalbert II, gnanc stada sin Cumin, nundir vegnida tagliada en tocs cun in cunti. Ultra de quei secapev' ei da sasez per in um sco Adalbert II ei staus, ch' el vegnessi a prevegnir a scadina profanaziun della bulla cun far adatadas condiziuns, avon che surdar quella, las qualas ein era vegnidas fatgas ed observadas, malgrad tutta alteraziun da part dil pievel e de ses manaders.
Ord las numerusas notizias sur Mistral Giachen Berchter semuoss' ei plinavon claramein, ch' el seigi staus da tut temps in sincer e beinvesiu amitg della Claustra e ch' el seigi gia ord tala rischun buca staus staus el cas de far in tal afrunt alla Claustra. Ils differents arguments cun las notizias accompignontas muossan evidentamein, che Mistral Giachen Berchter hagi buca tagliau en tocs la bulla, che siu scontener sin Cumin hagi fatg en negin gran dishonur a siu num e che sias relaziuns finanzialas seigien tuttavia buca stadas ord moda, sco era ch' el seigi silsuenter vivius e morts en honurs.
Las bunas relaziuns, che regeven denter la Claustra e la famiglia Berchter avon il Cumin de 1656, ein era semantenidas suenter, sco nus vesein quei principalmein tier sia mort 1676, ed ein era scartadas vi sils affons de Mistral Giachen Berchter. Perdetga da quei datan pliras notizias, che nus havein anflau sur ses dus fegls, P. Adalgott, conventual de Nossadunnaun e Podestat Gion
