Page:Il Cumin della Cadi de 1656 e Mistral Giachen Berchter.djvu/9

e benedius elle catedrala dal Nunci sco Avat de Muster e zvar gratis.^[1]

1655, ils 30 de Settember ha Nunci Frideric Borromeus relaschau ina scartira^[2], en vertit della quala suondontas pleivs e filialas deien vegnir totalmein orasut dagl uestgieu de Cuera e messas per adina sut la jurisdicziun quasi episcopala digl Avat de Muster: La pleiv da s. Pieder e s. Paul ad Ursera cun las filialas de Hospenthal e Realp, la pleiv de s. Vigeli a Tujetsch, de s. Gion Battesta a Muster, de s. Martin a Medel, de s. Gion Battesta a Sumvitg, de s. Martin a Trun, de Nossadunna a Breil cun las filialas de s. Martin e s. Sievi, de s. Geri a Schlans, de s. Leodegar ad Uors, de s. Geri a Ruschein, de s. Zein a Ladir, de s. Flurin a Siath, de s. Andriu a Ruaun, de s. Giulitta as Andiast, de s. Rumetg a Fallera, de s. Plaisch a Valendau e de s. Gion Battesta a Domet. — La numnada scartira dil Nunci ei vegnida termessa tier a tuts spirituals dellas sura pleivs ed ei 'gl ei vegniu commondau en vertit della s. obedientscha de corrispunder a quell' ordinaziun fatga en num dil Papa Alexander VII.^[3]

1655, ils 13 d'October ha Adalbert II, Avat da Muster, en consideraziun, che sia claustra seigi ussa totalmein exempta e che las allegadas pleivs stettien sut la jurisducziun della Claustra de Muster, pagau agl uestgiu de Cuera ils stipulai 2000 fl.^[4] Ina respectiva quittanza en num digl Uestg de Cuera ei suttascreta da Domdecan Bernadin Gaudenz, Auditor Barclamin Sorinus e dad auters plirs.

♣♣

Buca ditg suenter ch'igl Uestg ed ils Canonics de Cuera han giu retschiert quelle summa tut en aur, ein els stai fetg enriclai da haver in tal pass e contract, il qual els havessen ussa bugen

1. Tenor ina convenziun provisorica, fatga 1637, ils 27 de Zercladur a Faveras denter igl Uestg de Cuera ed ils Avats de Faveras e Muster, havess mintga niev Avat de Muster, priu ora il cas, ch'ei moress plirs Avats en in onn, giu de pagar 200 fl. agl Uestg per la confirmaziun e benedicziun ad aunc schar il cavagl, sin il qual igl Avat era cavalcaus, al „Mareschiallo“ digl Uestg. — Quei fuva denton era stau usitau avon. — La scartira originala sesanfla egl archiv episc. a Cuera. — Mira era Mohr Th., Regesten Nr. 324.
2. Ina copia de quella scartira sesanfla ella „Synopsis“.
3. Alexander VII ei vegnius elegius sco Papa ils 7 d'Avrel 1655.
4. In rensch en aur representava entuorn igl onn 1650, tenor ils daners ded oz il di, ina valetta de circa 10–11 fr. — Pia fuss quei stau ina summa de 20–22,000 fr. — Mira: Planta, P. C. Geld und Geldeswerte. Jahresbericht der histor.-antiq. Gesellschaft von Graubünden 1886.