16 At i Simón Pedro pekibatan ne ngana: ¡Ika ing Cristo ing Anak ning Dios a mabie!
17 Kanita i Jesus mekibat ya, ngana kea: Nuan ka, Simón, a anak nang Jonás: uling e na pepawaga keka ning laman at daya, nung e Ibpa kung atin karing banua.
18 At aku man sasabyan ku keka, king ika i Pedro, at babo na niting Batu italakad ke ing Iglesia ku; at ding pasbol ning infierno e re daigan.
19 At ibie ko keka ding salut ning kaarian banua; at ing talian mu keti sulip, matali ya naman banua; at ing kalagan mu keti sulip, makalag ya naman banua.
20 Kanita inutus na karing keang alagad king e ra sinabyan kaninuman a ya ing Cristo.
21 Manibat na kanita pigmulan nang sinabing Jesus karing keang alagad king kailangan kea ing uma ya Jerusalem, at magdusa yang dakal a bague karing makatua, at karing pun ding sacerdotes, ampon ding escribas, layun yang mate at subling mie king kakung aldo.
22 At kanita kewani neng Pedro, pigmulan nang pengatnanuan, ngana: ¡Guinu, kalunusan mu ing katawan mu; king makananumang bague e malyari keka iti!
23 Dapot ya, minarap ya kanita sinabi na kang Pedro: Mako ka king lalawan ku, Satanas; nakatakid ka kanaku: uling e mu atatalastan itang king Dios, nung a itang kating tau.
Pusunan ne ing crus na
24 Kanita pin sinabi nang Jesus karing keang alagad: Ing bisang tuki gugulutan ku, isakuil na ing keang sarili, at dalan ne ing cruz na, at tuki ya kaku,
25 Uling ing bisang miligtas king bie na, mawala ya kea; at ing kawalan king bie na king uli ku mu, akit ne
26 Uling ¿ nanung pakinabangnan na ning tau akatutan naman ing mabilug a yatu, at mawala neman ing kaladua na? ó ¿nanung aibye nang panatbua ning tau king kaladua na?
27 Uling ing Anak ning tau datang ya king ligaya nang Ibp na kayabe no ding keang angeles; a kanita ibie na king balang metung ing karampatan king depatan na.
