[Eg:]
dinguala dó etir cruth ocus deilb ocus ecuscc ocus chineul. Ro bui dana ni ali acci beus, i. nach tibrad mnai dogrés, dianus tuccad nech ali remiu.
3. Dochuatar iartain a echluchu ocus a oblori ocus a tharrṡaluigh sligith ocus a tecbta coicriche úad ocus ro ṡirsit hErinn ule itir thes ocus túaid, co fuaratar oc Inbir Chichmuino mnái a dingbalo do, i. Etaoin ingen Étair rí Eochraidhi. Doriachtatar dano a thechta ar ammus Eochada ocus tucsatar tuaruscabail na hingene do etir chruth ocus delb ocus écuscc.
Is ann siu dono dochuaid Eochaid do taphuirt na hingene, ocus issed rogab dar oenuch m‑Breg Letb, co n‑facca in n‑ingin for ur in tophuir. Ocus cir chuirréil aircit connecor di or aici bic folcuth a luing aircit, ocus cetri heoin oir furri, ocus gleóir gemma bec do charrmoccul bi forflesc na luinge sin. Brat caslechta corcarghlan immpi, folai chain co n‑dualuiph airccit ocus milech oir issiu brutt ossa bruinni. Léine lepbur chulpatach impi, issi cotat slemun do ṡita uainidi fo derginnlith oir ocus tuaghmílu ingantachu di ór ocus argat for a bruinnib issind lénith, i. co m‑ba forreil dona feruib táidlech ind óir frissin n‑grein issin t‑sítu úainidiu. Da triliss orbuidi for a cind ocus fighe chethurdhúaluch for cechtar n‑ai ocus mell oir for rinn cech dúail.
4. Is ann sin imorro ro bui inn ingen oc tatmech a fuilt dia folccath, ocus a di láim tri derca ṡedluch allenith immach, ocus ba gilighiur snechto n‑óenoidchi ceachtur a dí láim, ocus ba deirgightir sían slebi cechtur a da ghrúad. Deidghin coir comard ina cinn isse níamdo nemonnta. Ba glaissigtir
[LU:]
chuingid mná na ingine bad aldem no béth i n‑Ére dó. Al asbert, ní bíad ina farrad acht ben nad fesser nech do feraib hErend ríam.
3. Fofrith dó oc Inbiur Chichmaini i. Étáin ingen Etair, ocus dosbert Echaid iarom, ar bá comadas dó ar cruth ocus delb ocus cenel ocus áni ocus óidid ocus airdarcus.
