[LU:]
5. Indara fecht dan dona næbaib canait ceol n‑adamra oc molad Dé, in fecht n‑aill con tuaset fri ceol muintire nime, ar ní recat a les ind naim ní aile acht éstecht in ceoil risa coistet, ocus innithmigud inna soilse addecet, ocus a sásad don boltnogud fil is tir. Atá flaith adamra dan fri gnúis do gnúis[1] doib úathib sǽrdes, ocus fíal glainide etarro ocus erdam orda fris anes. Is trít‑sede immaiccet som fúath ocus foscugud muintire nime. Ni fil immorro fíal no temel eter muntir nime ocus inna nóemu, acht itat i foilse ocus i frecnarcus dóib illeth friu-som dogrés. Circull tentide dan imón tír sin imma cuaird ocus cách ind ocus ass ocus ni erchótigend.
6. Na da apstal déc immorro, ocus Máire óg ingen ina haireocht fó leith imón comdid cumachtach. Úasalathraig ocus fáde ocus descipuil Isu i comfocus dona apstalaib. Atát dan araile nóemógu do deis Maire ocus ré nách cían etarro.
- ↑ dogníus LU.
[LBr:]
5. Indara tan din dona noemaib canait ceol n‑adámru oc molad Dé, in feacht n‑aill con tuaiset fri ceol múintiri nime, ár ni adileniget na nóim oní aile acht esteacht in cheoil riasa coistet, ocus indethmiúgud na sollsi itchiat, ocus a sásad don boltanugud fil isin tír sin. Ata din flaith adamrai for gnúis doib uadib sairdess. Fial glonide eturru. ocus erdad órdai fris aness, ocus trit‑side imanaicet-sum delba ocus foscud muintire nime. Ni fil imorro nách temel itir múintir nime ocus na noemu, acht atát í follsi ocus i frecnarcus doib illeth friu-som do gres. Circill tentide din imo (sic) múintir sin ba cuairt, cách ind ocus ass ocus ni erchotig do neoch díb.
6. In dí apstal dec ocus Muri óg i n‑oirecht foleith imon coimdid cumachtach. Uasalathraig ocus fatha ocus descipuil Ísu Crist i comḟocus dona hapstalaib. Atat din nóemoga do dheis Muire ocus re m‑bic etarru. Nóidin tra ocus macoenu impu da cech aird ocus ceol enlathi muintiri nime
