[LU:]
fri grádaib nime. Ar ní innisfea nech a bruth ocus a bríg, a derge ocus a rofoillsi, a anius ocus a aibnius, a chumlacht ocus a chobsaidecht, imad a aingel ocus a archaingel oc cantain chiúil dó. A thechtairi roimdai chuci ocus úad co n‑athescaib rochumrib do cach budin ar úair, a mine ocus a rochendsa fri arailib, a ainmíne ocus a roacairbe fri lucht aile dib.
10. Día m‑bé nech occá sirfegad imme anair ocus aníar, anes ocus atúaid, fogéba do cech leith aci agid n‑airegda, soillsithir fó secht anda grían. Ní aicfea dan delb n‑dune fair do chind no coiss, acht na dlúinn thentide for lassad fón m‑bith, ocus cách for crith ocus for úamain remi. Is lomnán día soilse nem ocus talam ocus ruthen amal rétlaind ríg ina mórthimcell. Tri míle cheól n‑écsamail cecha óenclaisse fil oc classchétol imme. Binnithir ilcheólu in domain cach óen cheól fo leith dib-sede fessin.
[LBr:]
fri grádu nime. Ar ní indisfed nech aile a bruth, a bríg, a dérc, a roṡóllsi, a ainius, a aibnius, a chunnlacht, a chobsaidectt, ocus immad a aingel ocus a archaingel ocantain cheoil dó. A thimthirid roimdai chuci ocus uada co n‑athescu cumri da cech budin arnuair, a míne ocus a morchennsa fri aroilib, a anmíne ocus a agarbi fri lucht aile dib.
10. Dia m‑be nech ica ḟegad imme anoir ocus aniar, aness ocus (p. 254b:) atuaid, fógeba da cech leth a agaid n‑oiregdai, soillsi fo secht oltas grian. Ni ḟaicfe tra deilb n‑duinide fair do chind no coiss, acht ina dlúim deirg thentide for lassad fon m‑bith ocus cach for crith ocus uamun remi. Is lán da sóllsi nem ocus talam ocus ruithen amal rédlaind rigdai ina mortimchell. Tri mile ceol n‑ecsamail cech oen classach fil oc claiscetul imme, ocus binnithir ilcheolu domain cech ceol fo leith dib-side.
