[LU:]
derscaigtech dergóir ocus argit fair, co srethaib sainemla di liic lógmair ocus co m‑brechtrad gem n‑écsamnil ocus co cathairib ocus chorónib carrmocail forsna crunnu caingil sin. Tri leca logmara dan co fogur bláith ocus co m‑binne cheóil eter cach da primairecht ocus allethe úachtarcha ina lócharnaib for lassad. Secht míle aingel i n‑delbaib primcainnel oc soilsigud ocus oc inorchugud inna catrach má cúaird, secht míle aile ina certmedón oc lassad tría bithu sír imón cathraig rígdai. Fir domain i n‑óen bale, cid at línmair, nos fórfed do biud boltnogud cind óenchainle dina cainlib sin.
14. Do neoch trá do dáinib in domain nád rochet in cathraig sin asa m‑bín ocus díanid érdalta a haittreb iar fugiull brátha, is intib airbirit co anbsaid ocus co utmall i n‑dindgnaib ocus i cnocaib, i sescnib ocus irrotaigib a n‑aitreba, co tí chucu bráth.
Is amlaid dan atát na slóig sin ocus na hairechta, ocus
[LBr:]
dach derscaigtech arcait ocus óir fair. Teora lega lógmara din co fogur m‑blaith ocus co m‑binde ceoil itir cech da prímoirecht ocus allethi uachtaracha ina locharnaib for lasad. Secht míle aingel i n‑delbaib primchoindel ic sollsiugud ocus oc inṡorchugud inna catrach bá cuairt, secht míle aile ina certmedón oc lassad tria bithu sír imon rigchatliair. Fir domain i n‑oen bali, cid at línmara, nos foirfed do biud boltnugud chínd oenchondli dona condlib sin.
14. Do neoch tra do dóinib domain nat roichet in catraig sin asa m‑bíu ocus dianad erdalta a haittreb iar fuigell bratha, is inntib airbirit cho anbsaid ocus co hutmall i n‑dingnaib ocus i cnoccaib, i sescnib ocus irrotaigib a n‑aittreba, co tí bráth.
Is amlaid diu atat na sloig sin ocus na hoirechta, ocus aingel coemtechta cecha hænanma fil inntib oc umaloit ocus
