[LU:]
aingel comimtechta cacha hóenanma fil indib oc umallóit ocus timthirecht di. Fíal tened ocus fíal d’aigriud i prímdorus inna cathrae inna fíadnaisse, ocus siat i comthúarcain cind ar cind tria bithu. Fogur ocus fúamaud dan na fial siu oc comriachtain atcluinter fón m‑bith. Síl n‑Ádaim, dia cluintis in fogur sin, nos gebad ule crith ocus úamun doḟulachta remi. Itorsig thrá ocus it búadartha na pecdaig ocond fogur sin. Mád illeth immorro fri muintir nimi, ni cluinter din gárbthoraind sin acht lanbec do ráith, ocus binnithir cach ceól atacomnaic.
15. Is adbul íarom ocus is ingnad fria innisin sudigud inna catrach siu, ar is bec di mór aní ro innisemár dia hordaib ecsamlaib ocus dia ingantaib.
Is andam trá lasin n‑anmain iar comgnáis ocus comattrib na colla cona súan ocus cona sádaile ocus cona sáire, cona sóinmige insaigid ocus dula co rígsuide in dúleman, acht mani dig le heolchu aingel, ar is docomail drém na secht nime, ar
[LBr:]
oc timthirecht di. Fial tened ocus fial óigrid i primdorus na catrach ina fiadnaise oc comriachtain ocus oc comthuarcain cind ar chind tria bithu sír. Fogur din ocus fuaimm na fial sin itclúinter fon m‑bith. Sil n‑Adaim, dia cluntís in fogar sin, nos gébad uile crith ocus oman doḟulachta reme. It toirsig ocus it buaidertha din na pecdaig icon fogur sin. Mad illeth immorro fri múintir nime, ni cluinter don garbthoraind sin acht bec nammá, ocus bindithir cech ceol ata comnaic.
15. Is adbul iarom ocus is ingnad ré indisi (sic) súidiugud na catrach, ar is bec do mor inni itchuadumar dia hordaib ecsamla ocus dia hingantaib.
Is annam tra lasin anmain iar comgnáis ocus comaittreb na colla cona suan ocus cona sóinmigi ocus cona sadaile athascnum co rigsuide in duileman, acht mene dig la heolchu
12*
