[LU:]
ní assu nachai araili dib. Ar itát se dorais chóemtechta ar cind in chiniuda dóenna corrice in ríched. Ro sudiged dan dorsioir ocus cométaid o muintir nimi do forcomét cach dorais díb. Dorus iarom imd nime as nesu ille, is fair ro sudiged Míchél arcaingel ocus di óig ina farrad co flescaib iarnaidib (p. 29a:) ina n‑ochtaib do sroigled ocus d’esorcain na pecthach, co comraicet iarom andsin na pecdaig fri cétglifit ocus fri cétchesad na conaire cengait (i. tiagait).
16. Dorus immorro ind nime tanaisi, Aríel arcaingel as chometaid dó, ocus di oig inna farrad co sroiglib tentidib i n‑allamaib; is dib-sede sraiglit na pecdachu dar a n‑gnússib ocus dar a roscaib. Ro sudiged dan sruth tentide co forlasair fair i fíadnaise in dorais sin. Abersetus dan ainm aingil ingaire in t‑srotha sin derbas ocus niges anmand na nǽm din chutrumma chinad nos lenand, corroichet comelaine ocus
[LBr:]
aingel, ar is drong doccumail dreimm na secht nime, ar ni liassa nachai aroile dib. Atat sé dorais choemtechta for cind in chinedu dóenna cusin riched. Ro suidiged tra cometaid ocus doirseoir o múntir nime d’forcomét cech dorais díbsin. Dorus tra in nime as nessu ille, is fair ro suidiged Mícahel archaingel ocus di óig ina ḟail co flescaib iarnaide ina n‑ochtaib do sroiglead ocus esorcain na pecdach, co comraicet diu andsin na pecdaig fri cetaidber ocus fri cetchesad na conaire chengait.
16. Dorus tra in nime tanaise, Uribel archaingel is cométaid dó, ocus dí óig ina ḟail co sraiglib tentidib ina lámaib leo; ocus is díb-side sraiglit maccu báis dar a n‑gnúsib ocus roscaib. Ro suidiged diu sruth tentidi co forlasair fair i fiadnaise in dorais sin. Abersetus diu aingel coemthechta ocus coméda in t‑srotha. Is e in sruth sin derbus ocus niges anmunna na noem don chutruma chinad nos lenand, co roichet
