[LU:]
comsoillse fri etrochta rétland. Ro sudiged dan andsiu topor taitnemach co m‑bláthe ocus boltonugud do glanad ocus dídnad anmand inna fíren. Ingrinnid immorro ocus loscid anmand na pectach, ocus ní dingaib ní dib, acht is tuilled péne ocus pennaite ros ic and. Frisóchat iarom assin na pecdaig co m‑brón ocus dubu dermar, na fíréoin iarom co subu ocus forbǽlti co dorus in tres nimi.
17. Sornd tentide dan for lassad do gréss andsede. Dá míle déc cubat, iss ed ro soich a lassar i n‑ardde. Tíagait dam anmand na fíren triasin sornd sin la brafad súla. Ergorid immorro ocus loscid and anmand na pecthach co cend dá bliadan déc, conos beir iarsin aingel in cóimthechta cosin cetramad n‑dorus. Is amlaid dan atá dorus inotachta in chetramad nime ocus sruth tentide oc á thimchell amal in sruth remoind. Timchellaid dan múr for lassad, lethet a thened fri dá míle déc cubat tomsithir. Cengait immorro an-
[LBr:]
cómglaine ocus comṡollsi fri hetrochta redland. Ro suidiged din andsin topur taitnemach co m‑bláthi ocus co m‑boltnugud do díunach ocus do nige anmand na firian. Ingrennid immorro ocus loiscid anmanna na pecdach, ocus nis digaib ni díb, acht is tuilled péine ros ta and. Frisóchat iarom na pecdaig assein co m‑brón ocus duba dermair, ind ḟireoin immorro co súba ocus failti co dorus in tres nime.
17. Sornd tened din forlassad annside do gres. Da mile déc cubat, iss ed ro soich a lassar a n‑airde. Tiagait din anmanna na firian tresin sorn sin la brafud sula. Érḟuirgit immorro and anmanda na pecdach co cend da bliadan déc, conas beir iarsin aingel in coemthechta cusin cetramad dorus. Is amlaid din ata dorus innotachta in chethrumad nime ocus sruth téntide occa airchell amal in sruth remaind. Donoirchell din múr luaidi for lassad and, ocus lethet a thened fri da mile déc cubat tomsithir. Con cengait immorro anmand
