[LU:]
mand inna fírén taris, amal na beth etir, ocus fastóid anmand inna pectach fri ré da bliadan dec i tróge ocus i todernam, conos beir aingel in cóemtechta co dorus in chúced nime.
18. Sruth tentide beos and andsede, acht is écsamail hé frisna srotha aile, ar itá sóebchore sainrædach immedon in t‑srotha sin, ocus impáid immá cuaird anmand inna pecthach ocus nos fastand co cend se m‑bliadan déc. Ro soichet immorro ind fíréoin tairis fo chétóir cennach furech. In tan iarom as mithig túaslucud inna pecthach ass, benaid in t‑aingel in sruth co fleisc dúir co n‑ainciud lecdu, co tócband inna anmand súas do chind na flesci. Berid dan Míchél iarsin (p. 29b:) na anmand co dorus in t‑sessed nime. Ní armither immorro pían no thodernam dona anmannaib isin dorus sin, acht forosnaiter and o soillse ocus o etrochta líac logmar. Ro soich dan Míchél iarsin co aingel na trinóite, co taisfenat dib linaib in n‑anmain i fiadnaise De.
[LBr:]
na fírian tairis, amal na beth ann itir, ocus astaid anmand na pecdach fri ré da bliadan déc i tróigi ocus i todérnam mor, conus beir aingel in choemtechta co dorus in coiced nime.
18. Sruth tentide beos and side, acht is ecsamail he fris na srotha aile, ar ata sǽbchoiri saindriudach immedon in t‑srotha sin, co n‑impaid bá cuairt anmand na pecdach ocus conus astand co cend sé m‑bliadan dec. Saigit immorro na fireóin tairis cen ḟuirech. In tan tra is mithig tuaslucud na pecdach ass, benaid in t‑aingel in sruth co fleisc n‑dúir (p. 255a:) co n‑aicniud leomain, co tocaib ina hanmand suas do chind na flesci. Berid tra Mícahel na hanmand do dorus in t‑sessed nime, ocus ni hairmither din pian na todernum do anmandaib isin dorus sin, acht forosnaither and o soillsi ocus étrochta léc lógmar. Ro soich tra Mícahel iarsin co haingel na trinóti, co taisselbait díb línib in anmain i fiadnaise in duilemun.
