[LU:]
24. Atát dan slóig dímóra i n‑dichumuug hi traig na péne suthaine risin tír n‑etordorcha anall. Cachranúair trágid in pian dib, in n‑úair ailc tic thairsiu. Is iat iarom filet amlaid sin, in lucht dianid comthrom a maith ocus a n‑olc. Ocus isin ló brátha midfidir etarro, ocus bádfid a maith a n‑olc isind ló sin, ocus bertair iarsin do phurt bethad i frecnarcus Dé tria bithu sír.
25. Atat dan drem mór aile and hi comfocus dond lucht sin, ocus is adbul a pian. Is amlaid iarom atát, i cumriuch fri colomna tentide, muir tened impu connice a smecha, slabrada tentide imma medón fo deilb natrach. Lassait a n‑gnússi osin péin. Is iat iarom filet isin phéin sin, pecdaig ocus fingalaig ocus ǽs admillte ecailse Dé ocus airchinnig etrócair bíte ós inchaib martra nannǽb for danaib ocus dechmadaib na hecailsi, ocus dogníat dona indmasaib selba sainrudcha sech áigedu ocus aidlicnechu in comded.
[LBr:]
24. Atat diu sloig dímora in díchumang na péne frisin tír n‑etarḟuartha anall. Ocus cechranuair tráigid in pian díb, in uair aile toet tairsib. Is iat tra filet isin péin sin, i. in lucht dianid comtróm (sic) a maith ocus a n‑olc. Ocus illó brátha midfithir eturru, ocus dilegfaid a maith a n‑olc isin lo sin, ocus berthar iarom do purtt bethad i frecnarcus gnúsi Dé tria bit sír.
25. Atat tra drem dímor aile ann i focus don lucht sin, ocus is adbul a pian. Is amlaid iarom atat, i cuimriuch fri colamnu tentidi. Múr tentidi immpu có a smechu. Slabraid thentidi imma medón fó deilb natrach. Lassait a n‑gnúsi isin pén sin. Is iat tra filet isin péin truimm sin, i. fingalaig ocus oes aidmillti eclaisi Dé, i. airchindig etrocair bíti os inchuib martra na noem for danaib ocus dechmadaib Dé, co n‑denait dona hindmusaib selba saindriudacha sech áigedu ocus aidilgnechu in choimded.
