[LU:]
fessin. Acht chena ní aittrebat anmand co bráth ar is la demnaib a n‑oenur a airichas co lathe m‑brátha.
30. Mairg thra fil isna píanaib sin i comaittreb muintire díabail! Mairg nad foichlend in muintir sin! Mairg forsa m‑bía do thigernu demon díseir dairmitnech! Mairg bias oc estecht fri guba ocus fri golgaire na n‑anmand, oc troge ocus oc nemele frisin comdid im torachtain chucu laithe m‑brátha colluath, dús in fugebtáis nach n‑etarúarad isind ḟugiull, ar ni fagbat nach cumsanad co brath acht tri úara cach domnaig. Mairg dia m‑badognas diles in ferand sin tria bithu sir! Ar
[LBr:]
na pian fessin. Acht chena ní aitrebut anmanna co bráth, ar is la démnu a n‑oenur a airechus co laa in fuigill.
30. Mairc tra fil isna pianaib sin i comaitreib muintiri diabuil! Mairc nateroichligend in múinnter sin! Mairc forsa m‑bia do thigernai demun díscir denmnetach! Mairc ca m‑bia do thigernai dub dian demun doescair corrlond golgairi thruag díchumaic toirsi thren cen toirisium sírḟuacht ocus accorus atat accu bar oen. Mairc bias oc estecht fri guba ocus golgairi ina n‑anmand ic trogi ocus oc neméli frisin coimdid im thorachtain chuccu lathi brátha co luath, dús in fuigebtís nach n‑etarfuarud isin fuigell, ar ní ḟagbat cúmsanud co bráth acht tri huari cecha domnaig. Mairc dia m‑ba do gnás diles in ferand sin tria bit sir! Is amlaid din ata in maigen sin, ocus slebti tolla delgnecha and, muigi lomma loiscthecha, glenda duba tentidi, tulcha ruada rogarba, lathach dóimne tuilbréna, móinte mora delgnecha, sligthi salcha sírdorcha, féra gera rindaithe, clocha slemnu tenntide, aithe gira altnide, goetha luatha loisctecha, gorti garba gemreta, frasa derga tentidi, snechta serba sirgnathchi, goirt garb loisctech letartach, dorchu ina dúbgemriud, fuairiu ina sírsnechtu, teou indat morthenti, serbiu ina ueim. Lacha brena biastaidi, indsi fuara garba goethacha, tolla bréna bruthloiscthi. Talum garb gainmigi, osé slemun tuitmendach, se ruad rotaidi, dub dorcha detfadach, cairrcech cnocach cruadlasrach, osé aurcrom óigreta co reod, co caisirne amal chairrci
