[LU:]
digair na n‑demna a haithle a n‑oenaig ocus a n‑aniusa oc píanad na n‑anmand.
31. In tan trá canait slúaig nóema muintire nime claschetol comchubaid na n‑ocht tráth co subach ocus co forbǽlid ic molad in chomded, is and sin ferait ind anmand nualla trúaga torsecha oc a tuarcain cen tairisem la diongaib na n‑demna. Is iat sin trá na píana ocus na todernama ro follsig aingel in choimtechta do anmain Adomnán (sic) iar tascnam flatha nime.
Ro ucad iarsin ind anim la brafad súla triasin n‑erdam n‑ordu ocus triasin fíal n‑glainide co tír inna nǽm; is inti ceta rucad si, in tan conruloi a curp. O ro gab iarom ceill for anad ocus for airiseom isin tír sin, atchúala ina diáid triasin fíal guth ind aingil no forcongrad furre, co n‑igsed ar cúlu doridisi cosin corp cetna asa rescomloi, ocus co ro innised i n‑dálaib ocus airechtaib ocus i comthinoltaib lǽch ocus cle-
[LBr:]
demnu aithli a n‑oenaig ocus a n‑ainiusa oc pianad na n‑anmand.
31. In tan tra canait sloig noemda muintire nime claiscetul comchubaid na n‑ocht trath co subach ocus co forbælid ic morchoimded, is andsin lecat anmanda na pecdach nualla truaga toirsecha ic a tuarcain cen toirisium la drunga na n‑demna. Is iat sin na piana ocus na todeniuma troma ro ḟoillsig aingel in choemtechta do anmain Adamnáin iar n‑athascnam flatha nime. Rucad iarsin in animm la brafad súla tresan erdam n‑orda ocus trésan fial (p. 256a:) n‑gloinide co tír na noem; is i side cetna tír cusa tucad side, in tan ro escomlái asa curp. O rus gab iarom céill for anad ocus for isium (sic) isin tir sin, atchuala ina diaid triasin fial sin guth in aingil no forcongrad forri, co ro athcuired doridisi cusin corp cetna asa rescomla, ocus co n‑indised i n‑dálaib ocus
