Page:Kajawen 43 1927-10-27.pdf/5

ꦗꦮ​ꦲꦫꦱ​ꦱꦼꦥꦶ​꧈​ꦏꦺꦴꦚ꧀ꦕꦠ꧀ꦠꦤ꧀ꦫꦱꦤꦶꦫ​꧈​ꦠꦼꦩꦃ​ꦩꦮꦺꦃ​ꦠꦽꦚꦸꦃ​꧈​ꦏꦺꦴꦕꦏ꧀ꦲꦺꦴꦩ꧀ꦧꦏ꧀ꦏꦶꦁ​ꦱꦩꦺꦴꦢꦿ​꧈​ꦠꦸꦩꦼꦩ꧀ꦥꦸꦃ​ꦫꦶꦁ​ꦥꦥꦺꦫꦺꦁ​ꦥꦺꦴꦔꦺꦴꦭ꧀ꦭꦶꦁ​ꦠꦱꦶꦏ꧀꧈​ꦱꦫꦱꦺꦁ​ꦥꦔꦽꦉꦥ​꧉​

꧄ꦔꦽꦩ꧀ꦧꦏꦤꦶꦁ​ꦮꦤ​ꦠꦼꦥꦶ​ꦠꦱꦶꦏ꧀꧈​ꦭꦶꦂ​ꦩꦔꦸꦔꦏ꧀ꦏꦁ​ꦮꦁ​ꦱꦸꦭ꧀ꦭꦪꦂꦫꦤ꧀꧈​ꦫꦺꦴꦤ꧀ꦲꦺꦴꦧꦃ​ꦥꦶꦤ꧀ꦝ​ꦏꦸꦩ꧀ꦭꦮꦺ​꧈​ꦔꦤ꧀ꦝꦼꦒ꧀ꦏꦁ​ꦤꦼꦢꦾ​ꦏꦺꦴꦤ꧀ꦢꦸꦂ​꧈​ꦲꦩꦸꦩꦸꦫꦶꦃ​ꦠꦼꦤ꧀ꦠꦽꦩ꧀ꦮꦠꦮꦶꦱ꧀꧈​ꦩꦿꦶꦃ​ꦥꦸꦭꦶꦃ​ꦲꦺꦴꦤꦼꦁ​ꦔꦶꦫ​꧈​ꦲꦩꦸꦁ​ꦱꦁ​ꦭꦶꦤꦁ​ꦏꦸꦁ​꧈​ꦠꦤ꧀ꦱꦸꦫꦸꦠ꧀ꦢꦼꦉꦁ​ꦔꦶꦁ​ꦢꦿꦶꦪ​꧈​ꦥꦏ꧀ꦱ​ꦠꦸꦭꦸꦱ꧀ꦩꦸꦁ​ꦤꦶꦁ​ꦒꦭ꧀ꦫꦱꦤꦶꦁ​ꦲꦠꦶ​꧈​ꦠꦼꦠꦼꦥ꧀ꦱꦭꦩꦶꦤꦶꦫ​꧉​

꧄ꦮꦼꦤꦺꦃ​ꦏꦢꦶ​ꦥꦶꦤ꧀ꦝꦤꦶꦁ​ꦫꦂꦪꦭꦶꦠ꧀꧈​ꦏꦸꦢꦸ​ꦏꦸꦢꦸ​ꦏꦼꦭꦭꦸꦤꦶꦁ​ꦭꦩ꧀ꦥꦃ​꧈​ꦤꦸꦠꦸꦠ꧀ꦠꦶ​ꦩꦫꦶꦁ​ꦠꦶꦤ꧀ꦢꦏ꧀ꦏꦺ​꧈​ꦪꦺꦏꦸ​ꦭꦏꦸꦤꦶꦁ​ꦱꦼꦥꦸꦂ​꧈​ꦱꦸꦩꦼꦁ​ꦏ​ꦭꦶꦂ​ꦲꦱꦶꦥꦠ꧀ꦏꦸꦥꦶꦁ​꧈​ꦲꦚ꧀ꦗꦼꦭꦺꦃ​ꦲꦸꦫꦸꦠ꧀ꦩꦂꦒ​꧈​ꦤꦔꦶꦁ​ꦮꦸꦱ꧀ꦏꦧꦕꦸꦠ꧀꧈​ꦠꦼꦩꦃ​ꦲꦶꦁ​ꦏꦲꦤꦤ꧀ꦤꦶꦫ​꧈​ꦱꦔ꧀ꦒꦾꦺꦁ​ꦭꦏꦸ​ꦲꦶꦁ​ꦏꦁ​ꦏꦼꦠꦼꦩ꧀ꦧꦺꦤ꧀ꦥꦶꦤꦁ​ꦒꦶꦃ​꧈​ꦭꦶꦂ​ꦥꦁ​ꦒꦸꦒꦃꦲꦶꦁ​ꦗꦶꦮ​꧉​

꧋ꦏꦗꦼꦁ​ꦔꦶꦁ​ꦱꦸꦫꦲꦺꦴꦱ꧀ꦲꦶꦁ​ꦔꦶꦁ​ꦒꦶꦭ꧀꧈​ꦕꦼꦏꦏ꧀ꦏꦤ꧀꧉​

꧋ꦠꦶꦪꦁ​ꦗꦮꦶ​ꦥꦸꦤꦶꦏ​ꦩꦺꦃ​ꦲꦶꦕꦭ꧀ꦫꦲꦺꦴꦱ꧀ꦱꦶꦁ​ꦲꦶꦤ꧀ꦝꦸ꧈​ꦢꦺꦤꦶꦁ​ꦱꦩ꧀ꦥꦸꦤ꧀ꦏꦼꦢꦔꦺꦴꦤ꧀꧈​ꦩꦶꦭ​ꦏꦢꦺꦴꦱ꧀ꦥꦶꦥꦶꦤ꧀ꦝꦤꦶꦁ​ꦠꦠꦤꦼꦩ꧀ꦩꦤ꧀ꦒꦼꦫꦶꦁ​ꦠꦤ꧀ꦥ​ꦲꦁ​ꦱꦭ꧀ꦗꦮꦃ꧉​ꦤꦔꦶꦁ​ꦱꦤꦢꦾꦤ꧀ꦱꦩ꧀ꦥꦸꦤ꧀ꦩꦏꦠꦼꦤ꧀꧈​ꦮꦤ꧀ꦠꦸꦤꦶꦁ​ꦒꦼꦱꦁ​꧈​ꦢꦢꦺꦴꦱ꧀ꦲꦶꦁ​ꦒꦶꦃ​ꦊꦱ꧀ꦠꦤ꧀ꦠꦸꦤ꧀ꦒꦼꦱꦁ​꧈​ꦭꦤ꧀ꦒꦼꦱꦁ​ꦔꦶꦥꦸꦤ꧀ꦮꦲꦸ​ꦥꦚ꧀ꦕꦺꦤ꧀ꦱꦩ꧀ꦥꦸꦤ꧀ꦩꦮꦶ​ꦮꦶꦗꦶ꧈​ꦲꦶꦁ​ꦒꦶꦃ​ꦥꦸꦤꦶꦏ​ꦮꦶꦗꦶ​ꦲꦶꦁ​ꦏꦁ​ꦱꦩ꧀ꦥꦸꦤ꧀ꦠꦸꦩꦤꦼꦩ꧀ꦏꦭ​ꦫꦸꦩꦶꦪꦶꦤ꧀꧉​

꧋ꦱꦉꦁ​ꦗꦶꦮꦤꦶꦁ​ꦲꦶꦤ꧀ꦝꦸ​ꦝꦠꦼꦁ​꧈​ꦩꦺꦃ​ꦥꦔ꧀ꦭꦶꦁ​꧈​ꦢꦺꦤꦶꦁ​ꦱꦤ꧀ꦠꦸꦤ꧀ꦱꦶꦥꦠ꧀ꦠꦶꦥꦸꦤ꧀꧈​ꦤꦔꦶꦁ​ꦭꦗꦼꦁ​ꦏꦫꦲꦺꦴꦱ꧀꧈​ꦩꦤꦮꦶ​ꦮꦶꦗꦶꦤꦶꦥꦸꦤ꧀ꦠꦏ꧀ꦱꦶꦃ꧉​ꦩꦶꦭ​ꦱꦤꦢꦾꦤ꧀ꦱꦶꦥꦠ꧀ꦠꦶꦥꦸꦤ꧀ꦱꦤ꧀ꦠꦸꦤ꧀꧈​ꦱꦏꦶꦤ꧀ꦠꦼꦤ꧀ꦲꦶꦁ​ꦒꦶꦃ​ꦧꦝꦺ​ꦱꦒꦼꦢ꧀ꦒꦛꦸꦏ꧀꧈​ꦭꦤ꧀ꦏꦭꦩ꧀ꦥꦃꦲꦤ​ꦒꦛꦸꦏ꧀ꦏꦶꦥꦸꦤ꧀ꦮꦲꦸ​ꦱꦒꦼꦢ​ꦔꦿꦶꦏ​ꦔꦿꦶꦏꦶ​ꦲꦁ​ꦱꦭ꧀꧈​ꦲꦶꦁ​ꦒꦶꦃ​ꦥꦸꦤꦶꦏ꧈​ꦏꦮꦿꦸꦃ​ꦏꦶꦭꦺꦤ꧀ꦤꦤ꧀ꦭꦤ꧀ꦮꦺꦠꦤ꧀ꦤꦤ꧀ꦥꦸꦤꦶꦏ​ꦱꦤꦢꦾꦤ꧀ꦲꦶꦁ​ꦏꦁ​ꦢꦶꦥꦸꦤ꧀ꦠꦺꦏꦢ꧀ꦢꦏꦼꦤ꧀ꦧꦺꦢ꧈​ꦏꦲꦁ​ꦏꦃꦲ​ꦱꦒꦼꦢ꧀ꦒꦛꦸꦏ꧀꧈​ꦠꦤ꧀ꦥ​ꦲꦔꦿꦶꦱꦏ꧀ꦏꦏꦼꦤ꧀ꦠꦺꦏꦢ꧀ꦢꦶꦥꦸꦤ꧀꧉​

꧋ꦮꦸꦱꦤ​ꦱꦥꦼꦁ​ꦏꦼꦂꦫꦶꦥꦸꦤ꧀ꦱꦁ​ꦤꦼꦩ꧀ꦧꦺ​ꦫꦮꦸꦃ꧈​ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦠꦤ꧀ꦱꦃ​ꦢꦩꦼꦭ꧀ꦲꦺꦧꦃꦲꦶꦁ​ꦩꦤꦃ꧉​

꧋ꦏꦠꦽꦱ꧀ꦤꦤ꧀ꦤꦶꦁ​ꦲꦤꦏ꧀ꦝꦠꦼꦁ​ꦧꦶꦪꦸꦁ​꧉​

꧋ꦕꦤ꧀ꦝꦏ꧀ꦏꦶꦥꦸꦤ꧀ꦏꦗꦮꦺꦤ꧀ꦎꦁ​ꦏ 41꧉​

꧋ꦱꦢꦪ​ꦥꦏꦼꦩ꧀ꦥꦭ꧀ꦭꦤ꧀ꦤꦶꦥꦸꦤ꧀ꦥꦫ​ꦝꦺꦴꦏ꧀ꦠꦼꦂ​ꦲꦶꦁ​ꦱꦊꦧꦼꦠ꧀ꦠꦶꦁ​ꦗꦗꦃꦲꦤ꧀ꦗꦼꦦꦁ​꧈​ꦲꦶꦁ​ꦏꦁ​ꦱꦩꦶ​ꦧꦝꦺ​ꦤꦩ꧀ꦥꦺꦤ꧀ꦤꦶ​ꦝꦠꦼꦁ​ꦔꦶꦥꦸꦤ꧀ꦝꦺꦴꦏ꧀ꦠꦼꦂ​ꦟꦺꦴꦒꦸꦱꦶ꧈​ꦲꦶꦁ​ꦏꦁ​ꦱꦩ꧀ꦥꦸꦤ꧀ꦏꦺꦱꦃ​ 15 ​ꦠꦲꦸꦤ꧀ꦭꦩꦶꦤꦶꦥꦸꦤ꧀꧈​ꦱꦩꦁ​ꦏꦺ​ꦱꦩꦶ​ꦠꦠ​ꦠꦠ​ꦧꦝꦺ​ꦲꦔꦸꦂꦩꦠ꧀ꦠꦶ​ꦱꦲ​ꦲꦔꦠꦸꦂꦫꦏꦼꦤ꧀ꦥꦩ꧀ꦧꦒꦾ​ꦮꦶꦭꦸꦗꦼꦁ​ꦝꦠꦼꦁ​ꦲꦶꦁ​ꦏꦁ​ꦤꦼꦩ꧀ꦧꦺ​ꦫꦮꦸꦃ꧉​ꦩꦶꦤꦺꦴꦁ​ꦏ​ꦥꦏꦸꦂꦩꦠ꧀ꦠꦤ꧀꧈​ꦲꦶꦁ​ꦏꦶꦛ​ꦏꦶꦛ​ꦡꦺꦴꦏꦶꦪꦺꦴ꧈​ꦎꦯꦏ​ꦠꦸꦮꦶꦤ꧀ꦲꦶꦁ​ꦏꦶꦛ​ꦏꦶꦛ​ꦲꦒꦼꦁ​ꦱꦤꦺꦱ꧀ꦱꦶꦥꦸꦤ꧀꧈​ꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦝꦲꦂ​ꦥꦶꦱ꧀ꦠ꧉​ꦥꦫ​ꦱꦂꦗꦤ꧈​ꦥꦫ​ꦄꦃꦭꦶ​ꦥꦸꦭꦶꦠꦶꦏ꧀꧈​ꦥꦫ​ꦲꦂꦠꦮꦤ꧀꧈​ꦥꦫ​ꦱꦸꦢꦒꦂ​ꦲꦒꦼꦁ​ꦭꦤ꧀ꦱꦥꦤꦸꦁ​ꦒꦶꦭ꧀ꦭꦤ꧀ꦤꦶꦥꦸꦤ꧀꧈​ꦱꦩꦶ​ꦲꦔꦿꦸꦩꦲꦺꦴꦱ꧀ꦱꦶ​ꦩꦁ​ꦒꦺꦤ꧀ꦲꦶꦁ​ꦏꦭꦸꦲꦸꦂꦫꦤ꧀꧈​ꦧꦶꦭꦶꦃ​ꦱꦩꦶ​ꦱꦒꦼꦢ꧀ꦠꦸꦩꦸꦠ꧀ꦝꦲꦂ​ꦥꦶꦱ꧀ꦠ​ꦮꦺꦴꦤ꧀ꦠꦼꦤ꧀ꦲꦶꦁ​ꦥꦱꦩꦸꦮꦤ꧀ꦥꦏꦸꦂꦩꦠ꧀ꦠꦤ꧀ꦤꦶꦥꦸꦤ꧀ꦱꦁ​ꦩꦶꦤꦸꦭꦾ​ꦝꦺꦴꦏ꧀ꦠꦼꦂ​ꦮꦲꦸ꧉​ꦱꦢꦪ​ꦥꦏꦸꦂꦩꦠ꧀ꦠꦤ꧀ꦥꦶꦱ꧀ꦠ​ꦲꦶꦁ​ꦏꦁ​ꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦲꦶꦁ​ꦏꦶꦛ​ꦏꦶꦛ​ꦲꦶꦁ​ꦠꦤꦃ​ꦗꦼꦦꦁ​ꦮꦲꦸ꧈​ꦲꦶꦁ​ꦏꦶꦛ​ꦩꦶꦟꦺꦴꦮꦃ​ꦲꦶꦁ​ꦏꦁ​ꦲꦒꦼꦁ​ꦥꦶꦪꦩ꧀ꦧꦏ꧀꧉​ꦢꦺꦤꦺ​ꦏꦭ​ꦱꦩꦤ꧀ꦠꦼꦤ꧀ꦲꦶꦁ​ꦏꦁ​ꦱꦩꦶ​ꦝꦲꦂ​ꦥꦶꦱ꧀ꦠ꧇​ꦒꦸꦥꦽꦤꦸꦂꦫꦶꦁ​ꦏꦶꦛ​ꦔꦿꦶꦏꦸ꧈​ꦥꦔꦂꦱꦤꦶꦁ​ꦒꦸꦫꦸ​ꦲꦒꦼꦁ​ꦲꦶꦁ​ꦥꦩꦸꦭꦁ​ꦔꦤ꧀ꦭꦸꦲꦸꦂ​ꦏꦝꦺꦴꦏ꧀ꦠꦼꦫꦤ꧀ꦲꦶꦁ​ꦎꦯꦏ꧈​ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦧꦺꦴꦁ​ꦱ​ꦱꦂꦗꦤ​ꦱꦤꦺꦱ꧀ꦱꦶꦥꦸꦤ꧀꧈​ꦠꦸꦮꦶꦤ꧀ꦥꦫ​ꦄꦩ꧀ꦠꦼꦤꦂ​ꦭꦤ꧀ꦥꦫ​ꦱꦸꦢꦒꦂ​ꦲꦒꦼꦁ​​ꦲꦒꦼꦁ​꧉​ꦢꦺꦤꦺ​ꦲꦶꦁ​ꦏꦁ​ꦢꦶꦥꦸꦤ꧀ꦥꦶꦗꦶ​ꦱꦩꦶ​ꦲꦔ꧀ꦭꦢꦺꦴꦱ꧀ꦱꦶ​ꦱꦊꦧꦼꦠ꧀ꦠꦶꦁ​ꦥꦶꦱ꧀ꦠ​ꦮꦲꦸ꧈​ꦲꦶꦁ​ꦒꦶꦃ​ꦥꦸꦤꦶꦏ​ꦥꦫ​ꦮꦫꦁ​ꦒꦤ​ꦲꦶꦁ​ꦎꦯꦏ꧈