KENEHI
5 A i iti haere ano nga wai, a taea noatia te tekau o nga marama: no te tekau o nga marama, no te ra tuatahi o te marama, i kitea ai nga tihi o nga maunga.
6 ¶ A i te mutunga o nga ra e wha tekau, na, ka wahia e Noa te matapihi o te aaka i hangā e ia:
7 A, ka tukua atu e ia he raweni, a, tona rerenga atu, na ka kopiko atu ka kopiko mai, a maroke noa nga wai i runga i te whenua.
8 Na, ka tukua atu ano e ia he kukupa, kia kitea ai kua iti iho ranei nga wai i runga i te mata o te whenua;
9 A kihai i kitea e te kukupa tetahi taunga iho mo te takahanga o tona waewae, a ka hoki mai ki a ia ki roto ki te aaka: I runga hoki nga wai i te mata o te whenua katoa: na, ka totoro atu tona ringaringa, a hopukia ana, tangohia mai ana ki a ia ki roto ki te aaka.
10 Na, ka tatari ano ia, a e whitu atu nga ra; a ka tukua atu ano e ia te kukupa i roto i te aaka;
11 A ka rere mai te kukupa ki a ia i te ahiahi; na, ko tetahi rau oriwa kei roto i tona waha, he mea korari mai; a ka mohio a Noa kua iti iho nga wai i runga i te whenua.
12 A ka tatari ano ia, a e whitu atu nga ra; a tukua atu ana e ia te kukupa, a kihai tena i hoki mai ano ki a ia i muri iho.
13 ¶ A no te ono rau ma tahi o nga tau, no te marama tuatahi, no te tuatahi o te marama, i maroke atu ai nga wai i runga i te whenua: na, ka hurahia atu e Noa te hipoki o te aaka, a ka kite, na, kua maroke te mata o te whenua.
14 A no te rua o nga marama, no te rua tekau ma whitu o nga ra o te marama, i maroke ai te whenua.
15 ¶ Na, ka korero mai te Atua ki a Noa, ka mea,
16 Puta mai koe i roto i te aaka, koutou tahi ko to wahine, ko o tama, me nga wahine a o tama.
17 Kia puta tahi mai me koe nga mea ora katoa i a koe na, nga kikokiko katoa, nga manu, nga kararehe, me nga mea ngoki katoa e ngokingoki ana i runga i te whenua; a kia whakatuputupu ratou ki runga ki te whenua, kia hua, kia tini ki runga ki te whenua.
18 Na, ka puta mai a Noa, ratou tahi ko ana tamariki, ko tana wahine, me nga wahine a ana tamariki:
19 I puta mai i roto i te aaka nga kirehe katoa, nga mea ngokingoki katoa, nga manu katoa, me nga mea ngoki katoa i runga i te whenua o ia ahua o ia ahua.
20 ¶ Na, ka hanga a Noa i tetahi aata ma Ihowa, a ka tango i etahi o nga kararehe ma katoa, o nga manu ma katoa hoki, a whakaekea tinanatia ana e ia ki runga ki te aata.
21 Na, ka hongi mai a Ihowa ki te kakara reka; a ka mea a Ihowa i roto i tona ngakau, E kore ahau e kanga ano i te oneone a muri ake nei mo nga mahi a te tangata; otiia he kino nga tokonga ake o te ngakau o te tangata, o tona taitamarikitanga ake ano; e kore ano hoki ahau e patu i nga mea ora katoa a muri ake nei, e penei me tenei meatanga aku.
22 E kore e whakamutua i nga ra katoa o te whenua te po rui me te po kokoti, te maeke me te mahana, te raumati me te hotoke, te ao me te po.
UPOKO 9.
NA, ka manaakitia a Noa ratou ko ana tamariki e te Atua, a ka mea ia ki a ratou, Kia hua, kia tini koutou, kia kapi ano hoki te whenua i a koutou.
2 Kia wehi ano hoki i a koutou, kia matakana i a koutou nga kirehe katoa o te whenua, nga manu katoa o te rangi, nga mea katoa e korikori ana i runga i te whenua, me nga ika katoa hoki o te moana; kua hoatu ena mea ki to koutou ringa.
3 Hei kai ano ma koutou nga mea korikori katoa, nga mea ora; rite tonu ki to nga otaota matomato taku hoatutanga i nga mea katoa ki a koutou.
4 Otiia, kaua e kainga te kikokiko me tona oranga, ara, me ona toto.
5 Ka rapua hoki e ahau he utu mo o koutou toto e ora nei koutou; ka rapua e ahau he utu i nga kirehe katoa, i te tangata ano hoki; ka rapua e ahau he utu mo te matenga o te tangata i te teina o ia tangata o ia tangata.
6 E whakaheke tetahi i nga toto o te tangata, ma te tangata ano ona toto e whakaheke: no te mea no te Atua te ahua i hangā ai e ia te tangata.
7 Ko koutou hoki, kia hua, kia tini; kia nui to koutou uri ki runga ki te whenua, kia tini hoki ki reira.
8 ¶ A i korero mai ano te Atua ki a Noa, ratou tahi ko ana tamariki, i mea,
9 Ko au nei, nana, ka whakapumau ahau i taku kawenata ki a koutou ko to koutou uri i muri i a koutou;
10
Ki nga mea ora katoa hoki i a koutou, ki te manu, ki te kararehe, ki nga
8
