अर्धसंवाहक स्फटिकाची विचलीत जाल्ली संरचणूक लेसर किरणांच्या आदारान ताच्या भायल्या भागाचें अनुशीतन केल्यार (तापोवन मागीर ल्हव ल्हव थंड केल्यार)परत पूर्णावस्थेंत व्हरपाक येतात. लेसरच्या आदारान रामन परिणामाचो अभ्यास केल्यार ताचेपसून जालकाच्या कंपनक्रियेविशींची म्हत्वाची म्हायती मेळपाक शकता.संगणकशास्त्रांत व्हडल्या व्हडल्या दुर्मिळ ग्रंथांचें मुद्रण आनी पुनर्लेखन करपाखातीर लेसर तबकडेचो उपेग जाता. त्याचप्रमाण सिनेमा,वेगवेगळ्यो कार्यावळी,संगीत रचना हांचीय नोंदणी आनी पुनर्वाचन करूं येता. इलेक्ट्रॉनीय भागांच्या जोडणीखातीर आनी तातुंतले दोश सोदून काडपाखातीर लेसर डाखकाम ही नवी पध्दत आयल्या.हे पध्दतीन मुद्रीत मंडलांची जोडणी करतात आनी तातुंतले दोशूय सोदून काडूं येतात.
लेयर उजवाड पदार्थाचेर घातलो जाल्यार ताचेपसून जो खास असो उजवाड मेळटा ताचो अभ्यास करून पदार्थांतलीं घटकद्रव्यां, विक्षोभित अवस्थेंतली अणुरेणूंची सापेभ समष्टी ह्या गजालींचो सोद घेवं येता. लेसर उजवाडाच्या झोताच्या आदारान आयनद्रायूचें निदानूय करपाक येता.
लेसरच्या आदारान लांबायेचें अचूक मापन करूं येता.तशेंच पृश्ठभागाची सपाटीय अचूकपणान तपासपाक येता.विमान, उपगिरो, चंद्रीम सारकिल्ल्या ---- पदार्थांचो मार्ग, तांची सदची स्थिती आनी देग हांचोय अभ्यास लेसराच्या आदारान करपाक येता. अमेरिकेन लेजिऑस (LAGEOS, लेसर जिऑडायनॅमिक सॅटेलायट) हो उपगिरो ५८०० किमि.उंचायेर सोडिल्लो आसून तो लेसर स्पंद धर्तरेवयल्यान परावर्तित करता.ताच्या आदारान धर्तरेच्या भायल्या भागाचें चलन अभ्यासपाक येता आनी ताकालागून भूंयकांप केन्ना जातलो हें सांगपाक आदार जाता.
-कों. वि. सं. मं. लैंगिक वर्तन: मनीस तशेंच हेर जिवांच्या शारिरीक आनी मनोसामाजीक प्रेरणेंतल्यान घडिल्लें वर्तन, नदर, वास,स्पर्श, उतर सारकिल्ल्या बाह्य घटक आनी विचार,कल्पना, इत्सा सारकिल्ले मानसिक घटक अशा दोनय घटकांच्या प्रभावाखाल कामप्रेरणा निर्माण जाता.
ऋग्वेदांतल्या नारदीय सुक्तांत हे ‘कामस्तदग्रे समवर्तताधि’ म्हणून मनीस कुळयेचे कामप्रेरणेक पयली सुवात दिल्या. पुर्विल्ल्या भारतांत आदिवासी जामातींत शिश्नदेवाची पुजा प्रचलित आशिल्ली.फुडें आर्यांनी शिवलिंग पुजा आचरणांत हाडली.आर्यधर्मांत जे चार पुरषार्थ सांगल्यात तातूंत काम हो एक आसा.सिग्मंड फ्रॉयडच्या मनोविश्लेशण सिध्दांता प्रमाण काम प्रेरणा ही मानवाची केंद्रीय जिवन प्रेरणा आसा. काम ह्या विशयाचेर सद्या उपलब्ध आशिल्ल्या वात्सायनाचो कामशास्त्र वा कामसूत्र हो ग्रंथ इ. स. तिसऱ्या- चवथ्या शतमानांत बरयल्लो.ताच्याय आदीं उद्दालकयूत श्वेतकेतू, बाभ्रव्य, पांचाल, दत्तकाचार्य, चारायण, सुवर्णनाभ,घोटकमुख, गोनर्दीय, गोणिकापुत्र कुचुमार ह्या पंडिलांनी ह्या विशयांचेर ग्रंथ बरयल्ले. पूण हे ग्रंथ आज उपलब्ध नात. वात्सायनाच्या कामशास्त्रा उपरांतय ह्या विशयाचेर जायते ग्रंथ बरयल्ले, तातुंतले कांय उल्लेख करपासारके अशे- (१) कोक्कोक: रतिरहस्य वा कोकशास्त्र (बाराव्या शतमानाआदीं), (२) यशोधर: कामशास्त्रावयली जयमंगला ही टीका (तेरावें शतमान), (४)कल्याणमल्ल: अनंगरंग (सोळावें शतमान), (५) जयदेव रतिमंजिरी ह्या ग्रंथांनी कामवासनेच्यो तृप्ती करपाच्यो पद्दती, तांची साधनां वशीकरण, प्रियानुनय, शिश्नोब्धान, लिंगवृध्दी आदीखातीर येवजुपाचे गुपीत उपाय, युकत्यो, वेश्येच्या वागणुकीचे नेम अशा तरेच्या प्रश्नांक म्गत्व दिल्लें आसा. तशेंच कामजिणेची म्हायतीय खुबशी कल्पनाप्रधान आसा.
अस्तंत्या देशांत ह्या विशयावेल्या संशोधनाक एकोणिसाव्या शतमानाच्या निमाणें सुरवात जाली. मॅग्नस हर्शफेल्ड, हॅवलॉक एलिस, सिंग्मंड फ्रॉयड, विल्हेल्म स्टेकेल आदी अभ्यासकांनी कामजिविताचो विज्ञानीक अभ्यास सुरू केलो. अमेरिकेंत विसाव्या शतमानांत आर्. एल. डिकिन्सन, के. बी. डेव्हिस, अल्. एम. टर्मन, एय. सी. किन्से, डब्ल्यू. एच्. मास्टर्स आनी व्ही.ई. जॉन्सन आदी वैज्ञानिकांनी ह्या विशयाचें शास्त्रीय संशोधन केलें. मास्टर्स आनी जॉन्सन हांच्या मानवी संभोग क्रियेच्या प्रयोगशालेय अभ्यासाचेर ह्यूमन सेक्शुअल रिस्पॉन्स हो ग्रंथ आदारिल्लो आसा.
विसाव्या शतमानांत महाराष्ट्रांत डॉ. र. धों. कर्वे हाणें कामजिविताचेर म्हायती दिवपी ‘आधुनीक कामशास्त्र’ नांवाचें पुस्तक बरयलां. तशेंच ह्या विशयावयलें समाजस्वास्थ्य नांवाचें नेमाळेंय तो चलयतालो.
कामप्रेरणा ही चडकरून प्राण्यांचे शरिरस्थितीचेर मुखेलपणान लैंगिक ग्रंथीच्या अंत: स्त्रावाचेर आनी रसायनाचेर आदारून आसता. हीं रसायनां रक्तप्रवाहांतल्यान प्राण्याच्या मेंदवामेरेन पावलीं म्हण्टकच तो प्राणी लैंगीक वर्तनाक प्रवृत्त जाता आनी सर्वसादारणपणान सजातीय भिन्न लिंगीय प्राण्याचेर आकर्शीत जावन संभोगक्रियेंत परिणत जावपी प्रक्रिया ताचे कडच्यान घडटात. लैंगिक रसायनाक लागून जुवान अवस्थेंत प्रवेश करपी नर- मादीचे कुडींत जायते आंतरीक आनी बाह्य बदल घडून येतात. नरांमदी आवाज फुटप, ओंठार, दाडयेर, छातयेर तशें हेर भागांचेर केंस येवप, जाल्यार मादयेंत स्तनांची वाड जावप आदी बाह्य लैंगिक लक्षणां प्रकट जातात. तशेंच नरांमदी बीजग्रंथांची वाड पुराय जावन विर्योत्पादन आनी मादयेमदीं रजोदर्शन वा मासिक पाळी सुरू जाता. जुवान नर- मादयेच्या मनांत नव्यो इत्सा- आकांक्षा जाग्यो जातात. ताका नवी अस्वस्थता जाणवता
