रोमानो हाचीं तेचपरी हेर जायत्या चित्रकाराचीं मैथुनाच्या आसनाचीं चित्रां इटलींत आनी ग्रिसांत उपलब्ध आसा।
-को।वि।सं।मं।
लैंगिक विकृती : अनफाटी लैंगिक कृती (Sexual deviation) हातूंत प्रतिलैंगिकता(Trans Sexuality), आंतर लैंगिकता (Inter Sexuality), समलिंगी कामुकता(Homo Sexuality), अगम्य आप्त संभोग(Insest), वस्तुकामुकता(Fatisism), बालकामुकता(Pedofelia), वेशांतरण(Transvetism), लिंग प्रदर्शन प्रवृत्ती(Exhibionism), लिंग दर्शन सुखकामुकता(virism), परपिडन रती(Sadism), स्वपिडन रती(Mesocism), लिंग स्पर्श कामुकता(frotonism) आदी विकृतींचो आस्पाव जाता।
ह्या विकृतींकडे पळोवपाची आधुनिक काळाची भुमिका आधुनिक काळाच्या समाजीक आनी मनोविज्ञानीक संदर्भांत पुरातन भुमिके परस समंजस आशिल्ल्यान अशा अपाकृतीक लैंगिक अपमार्गण ही संज्ञा दिवप जाल्या।
सामाजीक, कुटुंबीक वातावरण, नैतिकता, संगत, लैंगिक कृतीबदल अज्ञान, अपसमज, भयगंड, एकलेंपण, स्वताचे कामूक शक्तीबद्दल न्यूनगंड हीं अपमार्गणाचीं कांय कारणां आसात।
लैंगिक जिवीताचेर नैतिकतेचे नदरेन समाजीक बंधनां घालप गरजेचें जालें। हाका लागून लैंगिक जिवीत आनी ताच्या वेव्हारा संबंदीं गुप्तताय पाळपाची वृत्ती निर्माण जाली। गुप्तताय, समाजीक बधनाचें दडपण हाकालागून लैंगिक कृती संबंदी गैृसमजुती निर्माण जाल्यो। ह्या गैर समजुतींतल्या मानसीक तशेंच शारिरीक विकृतीक सुवात मेळ्ळी।
लैंगिक शिक्षण : लैंगिक विकृती पयस करून निरामय अशा लैंगिक जिवनाचो आस्वाद घेवपाचें शिक्षण लैंगिक शिक्षणा वरवीं साध्य करूं येता, अशी लैंगिक शिक्षण समर्थकाची अपेक्षा आसा। हें लैंगिक शिक्षण मनीस प्रजननक्षम जावचे आादी म्हणजेच चलयांक पिरायेच्या बाराव्या वर्सा आनी चल्यांक पिरायेच्या चवदाव्या वर्सा दिवप योग्य समजतात। लैंगिक शिक्षणांत बायल दादल्यांच्या जननेंद्रियांची रचना, तांचें रोग तशेंच लैंगिक व्यवहाराविशीं धर्मीक आनी समाजीक नितीबंधनां आदींची म्हायती आस्पावची। हातुंतली खंयची म्हायती वयाचे खंयचे अवस्थेंत आनी कशे तरेन दिवंची तें बालविकास तज्ञांच्या आनी शिक्षणतज्ञांच्या सल्ल्यान थारावंचें अशें जाणकाराचें मत आसा।
सुरवेक म्हळ्यार मुळावें गिन्यान आवय बापाय वरवीं दिवं येता. भुरग्याक मुळावी आयोग्याविशीं जतनाय, जननेंद्रियाची नितळसाण हे विशींची म्हायती देखींसयत दिवं येता.
