आंदोलनां त वांटो घेतिल्लो.हाका लागून ताका बंदखणीची ख्यास्त जाली.सुरवेक ताका अमरावती जेलींत दवरलो.उपरांत ताका चोरयां व्हरून वेल्लोर बदखणींत दवरलो.बंदखणींतल्यान सुटल्याउपरांत ताणें आपल्याक पुरायपणान भारतीय स्वातंत्र्य चळवळींत ओंपून घेतलो.तेखातीर ताणें आपली वकालतय सोडून दिल्ली.
भारताक स्वातंत्र्य मेळ्ळ्या उपरांत ताका श्रीलंकेचो भारतीय उच्चायुक्त म्हूण नेमलो.१९५७ त ताची उत्तर प्रदेशाचो राज्यपाल म्हूण नेमणूक जाली.जाल्यार १९६५त तो म्हैसूरचो राज्यपाल जालो.गिरीन मद्रास मंत्रिमंडळांतय दोन खेपे मंत्रीपदाचेर काम केलां.१९६७त तो भारताचो उपराश्ट्रपती जालो.
डॉ.झाकिर हुसैनाक राश्ट्रपती जावन दोन वर्सांनीच मरण आयल्या उपरांत,राश्ट्रपती पदाखातीर मध्यवर्ती वेंचणूक जाली.तातुंत वराहगिरी वेंकटगिरीक जैत मेळोवन तो भारताचो चवथो राश्ट्रपती जालो.२४ ऑगस्ट १९७४ दिसा ताचो पांच वर्सांचो कार्यकाळ सोंपलो.
वेंकटमाधव:(इ.स.११ वो शेंकडो).
ऋकसंहितेचो एक भाश्यकार.ताणें ऋग्वेदाचेर दोन भाश्यां बरयल्यांत असो कांय लोकांचो तर्क आसा.पयल्या भाश्याच्या,पयल्या अध्यायाच्या शेवटाक वेंकटमाधवन आपली वळख करून दिल्या,त्या प्रमाण ताच्या बापायचें नांव वेंकटार्य आनी आवयचें नांव सुंदरी अशें आशिल्लें.ताका वेंकट आनी गोविंद नांवाचे दोन पूत आशिल्ले.तो कौशिक गोत्री आशिल्लो आनी चोल देशांत तो रावतालो.
ताच्या भाश्याचें नांव ऋगर्थदीपिका आसून तें सामकें ल्हान आसा.ताणें फकत मंत्रांतल्या पदांचीय व्याख्या केल्या.ताणें बरेच कडेन ब्राह्मण ग्रंथांतलीं दिल्यांत.वेदांतलो गूध अर्थ समजून घेवपाखातीर ब्राह्मण ग्रंथांचो बरोच उपेग जाता,अशेंय ताणें सांगलां.ऋग्वेदाचो अर्थ कोणाक कितलो कळटा हाचे विशींचो ताचो एक श्र्लोक गाजला,तो म्हळ्यार-
संहितायास्तुरियांश विजानन्त्यधुनातना :।
निरुक्तव्याकरणयोरासीत् येषां परिश्रम :॥
अथ ये ब्राह्मणार्थानां विवेक्तार : कृतश्रम :।
शब्दरीतिं विजानन्ति ते सर्व कथयन्त्यपि ॥
अर्थ-जांणी फकत निरुक्त आनी वव्याकरण हांचो अभ्यास केल्लो आसा, अशा जार्विल्ल्या लोकांक ऋकसंहितेचो फकत चवथो वांटो(एक चतुर्थांश) अर्थ समजता.पूण जांणी ब्राह्मण ग्रंथाच्या अर्थाची पोडणिशी कश्ट घेवन केल्या,अशो शब्दरीती जाणा जावपी विद्वानांकय वेदाचो पुराय अर्थ समजता आनी ते तो सांगतात.
वेंकट माधवान वेदार्थाचें ब्राह्मण ग्रंथांक फावो अशें प्रतिपादन केलां.वैदिक मंत्राचो अर्थ समजून घेवपाच्या वावरांत ह्या भाश्यांचो चड बरो उपेग जाता, अशें जाणकारांचें मत आसा.
वेंकटरामन,रामास्वामी:(जल्म:४ डिसेंबर १९१०,राजामाडम-तंजावर).
भारताचो आठवो राश्ट्राध्यक्ष.ताच्यो राश्ट्राध्यक्षाचो कार्यकाळ २५ जुलय १९८७ ते २५ जुलय १९९२ आसा.भारताचो राश्ट्राध्यक्ष म्हूण वेंचून येवपी तो सगळ्यांत जाण्टे पिरायेचो.ताचें मुळावें आनी उंचेलें शिक्षण मद्रास शारांत जालें.अर्थशास्त्रांत पदव्युत्तर पदवी चघेतल्या उपरांत,ताणें मद्रास लॉ कॉलेजींतल्यान कायद्याचें शिक्षण घेतलें.
वेंकटरामन ल्हानपणासावनच राश्ट्रीयतेचे भावनेन प्रेरीत जाल्ल्यान ताणें ब्रिटिश सरकारी कामाक न्हयकार दिवन वकालत सुरू केली.१९३३ मेरेन ताणें मद्रासच्या उच्च न्यायालयांत खूब नामना जोडली.१९३८ त वेंकटराओमनाचें जानकी देवी कडेन लग्न जालें.
वकालत करता आसतनाच तो राश्ट्रीय आंदोलनांनी वांटो घेवपाक लागलो.१९४२ त गांधीजीन जाहिर केल्ल्या भारत छोडो आंदोलनांत ताणें वांटो घेतिल्लो.उपरांत तो गांधिजीचो अनुयायी जालो.वकालत सोडून तो आंदोलनांनी सक्रीय वांटो घेवपाक लागलो,देखून ब्रिटिश सरकारान ताका दोन वर्सां नजर कैदेंत दवरलो.१९४४ त बंदखणींयल्यान सुटल्याउपरांत तमिळनाडू काँग्रेस समितीची श्रम शाखेची संघटना ताणें आपल्या हातांत घेतली.१९४६ वर्सा ब्रिटिश सरकारान ताका मलाया आनी सिंगापुरच्या जपानी घुरये वेळार,जपानाक आदार केल्लो म्हूण अपराधी मानलो.
१९४७ ते १९५० मेरेन ताणें मद्रास प्रांतीय वकील म्हासंघाचो सचिव म्हूण काम केलें.वेंकटरामनान १९४८ त लेबर लॉ जर्नल सुरू करून तातुंतल्यान तो कामगारासंबंदीचे म्हत्वाचे निर्णय प्रकाशीत करपाक लागलो.ल्हव ल्हव कामगार संघटनांकडेन लागीं येवन,ताणें साबार कामगार संघटना स्थापीत केल्यो.
१९५० त तो स्वतंत्र भारताचे पयले संसदेचो वांगडी म्हूण वेंचून आयलो.१९५२ त न्युझीलँडांत आयोजीत केल्ल्या राश्ट्रमंडळ संसदीय सम्मेलनांत तो भारतीय संसदीय प्रतिनिधी मंडळाचो एक वांगडीम आसलो.१९५७ त तो संसदेचो वांगडी म्हुण परतून वेंचून आयलो.पूण कांय दिसांनीच लोकसभेक सोडचीट दिवन तो मद्रास राज्य-सरकार मंत्रीमंडळांत आयलो.थंय ताणें १९५७ ते १९६७ मेरेन उद्देग,श्रम,सहकारिता,विद्युत्,पर्यावरण आनी वाणिज्य हीं खातीं सांबाळ्ळी.१९६७ त वेंकटरमणाक केंद्रीय येवजण आयोगाचो एक वांगडी म्हूण नेमलो.ताचेकडेन उद्येग,श्रम,विद्युत्,पर्यावरण,
