अशें करतना संगणकाच्या खाशेले संगणक भाशेचो उपेग करचो पडटा हे भाशेचे दोन प्रकार आसात. उच्च स्तरीय भाशा (देखीकः Assembley). सोफ्ट वेअराचे दोन प्रकार आसतात. सिस्टम सोफ्ट वेअर(System Soft Ware) अॅप्लीकेशन सोफ्टवेअर (Application Soft ware) पयल्या प्रकारांत बरोवपाक, बरयल्ले प्रोग्राम तपासपाक मदत करतात. अॅप्लीकेशन सोफ्ट वेअर हें एका विशिश्ट अशा प्रकारचें काम करता.
संगणकाची सगळी उबारणी, मांडणी आनी ताचें म्हत्व हें ताच्या चार मखेल गुणासंबंदीत आसा. ते गूण अशेः- गती(Speed) अचुकपण (accuracy) म्हायतीची सांठवण आनी गरजेप्रमाण उपेग (Storage and retriereal), सुसंगती (Consistency) ह्या चार गुणांच्या म्हालवजार संगणक हें आयच्या काळांतलें आस्थापनांतलें सगळ्यांत गरजेचें, व्हड प्रमाणांत उपेगाचें आनी म्हत्वाचें साधन जालां.
आयच्या काळांत बँकांचे तशेंच हेर वेपारी आस्थापनांचे हिशोब, शिक्षणाचे निकाल, येरादारीचें नियंत्रण, हवामानाची सुचोवणी, झूजसंदेश, अशा मळांचेर संगणकाचो उपेग जाताच. ते भायर बुध्दीबळाचो खेळ, एके भाशेसावन दुसरे भाशेचो अणकार, संगिताची मांडावळ आनी हेर तत्सम मळांचेरय संगणकाचो वापर व्हड प्रमाणांत जावंक लागला.
संशोधन शास्त्रांत आनी संशोधन प्रक्रियेक संगणक हें खूब आवश्यक अशें उपकरण जालां.
-डॉ.व्ही.व्ही.कामत
संगीतः गीत गायनाचो आविश्कार. संग+गीत=संगीत अशी ह्या शब्दाची रचणूक जाल्या आनी तातूंतल्यान गिताचें श्रुती माधुर्य जाणवता. गीतम् वाद्यम् च् नृत्यम च् त्रयं सगीतमुचते अशी भरतमुनीन संगिताची व्याख्या केल्या. हे व्याख्ये प्रमाण गीत, वाद्य आनी नृत्य अशा तीन एकत्रीत घटकांक संगीत ही उपाधी दिल्या. सर्वसादारणपणान गीत-गायन आविश्काराक संगीत कला आविश्कार म्हणप जाता. संगीत कला आविश्कारांत गायन मुखेलपदार आसलें तरी ताका वाद्याची साथ लागता. इतलेंच न्हय तर ही वाद्याची साथ गीत-गायनाक आदारभूत जाता. वाद्याचे साथीबगर केल्लें गीत-गायन संगिताच्या संदर्भांत अपुरें जालां. नाचाखातीर गायन तशेंच वाद्य आवश्यक थारता. निखटें वाद्य-वादन हो प्रकार सुरवेक नासलोच म्हळ्यार उपकारता. अशे तरेन गीत, वाद्य आनी नृत्य हांचो एकामेकांचेर आदारीत असो अतूट संबंद उरता.गिताचे गळ्यांतले स्वर, वाद्याचे बोल आनी नाचाचे पद्न्यास एके लयींत मेळटा आशिल्ल्यान गिताचे स्वर, वाद्याचेर काडप शक्य जाता आनी वाद्याच्या ठेक्याचेर नृत्याचो पद्न्यास करूंक मेळटा. गीत, वाद्य आनी पद्न्यास ह्या तिनय आविश्कारांक सूर, लय, ताल आनी गेयता हांची जोड मेळून संगीत कला सगळ्या कलांमदीं अग्रणी कला म्हूण वळखतात.
भोवतेक सगळ्याच संस्कृतींनी संगीत कलेक दैवी कला मानल्या. कारण जें जें उदात्त तें तें दैवी अशी मानपाची मनशाची प्रवृत्ती आसा. हेर सगळ्या मानवी आविश्कारांप्रमाण संगीत आविश्काराची निर्मिती सैमीक पद्दतीन जाल्या. मनशाचो हुंकार, दर्याचो गाज, सुकण्याची किलबील, झाडांमदली वाऱ्याची शिळोणी, काळजाची धडपड हे आद्य सैमीक संगीत आविश्कार ह्या आद्य संगीत आविश्कारांच्या वळखीन करून घेवन मनशांक ल्हव ल्हव करून कृत्रीम पद्दतीन (साधना वृत्तीन) आकार बध्द अशा संगीत अविश्काराची बुन्याद घाली. मनांतल्यो भाव-भावना, आशा-आकांक्षा संगिताच्या माध्यमांतल्यान उक्त्यो जावंक लागल्यो.
लोकसंगीत ही मानवनिर्मित संगिताची पयली अवस्था. हे अवस्थेंतल्या संगितांत मनशाच्यो निखळ भावना उक्तेपणान आनी निर्भिरपणान प्रदर्शित जाल्ल्यो मेळटात. अजय लोकसंगिताक एकंदर संगितांत खाशेली सुवात ह्याच कारणाक लागून मेळ्ळ्या आनी ह्याच कारणाक लागून ताचें आजय आकर्शण उरलां. आयच्या काळांत मुखार आयिल्ल्या अभिजात संगिताक सगळ्याच संगीत प्रकारांत मानाची सुवात आसली आनी तिची एक आदर्श अशी उज्वल परंपरा आसली तरी सर्वसामान्य मनशाची संगीत आविश्कार निर्मिती मुखेलपणान लोकसंगितांत जाल्ली दिश्टी पडटा.
भारतीय संगिताचे हिंदुस्थानी आनी कर्नाटकी अशे दोन मुखेल प्रकार आसात. लोकसंगीत आनी अभिजात संगीत हांची दोगांयची सांगड घालून भारती मिश्र संगिताची एक परंपरा आसा. हे परंपरेत भजन, गझल, कव्वाली, चित्रपट संगीत, नाट्य संगीत,सुगम संगीत, लावणी सारकिल्ल्या संगिताची भारतांत एक परंपरा निर्माण जाल्या आनी हें संगीतय लोकप्रिय जालां.
अस्तंत्या संगिताच्या प्रभावाखाला आनी आकर्शणाखाला येवन भारतीय संगीत अस्तंत्या संगिताचो साज घेवन मुखार येवपाक लागलां. अशा संगिताचे प्रयोग टी.व्ही. सारक्या माध्यमांतल्यान आनी माचयेवयल्या कार्यक्रमांतल्यान लोकांक आकर्शित करूंक लागल्यात.
लोकसंगीतः लोकांचे जिबेर अचळय घोळपी संगीत.सर्वसामान्य मनशाचो सैमीक पद्दतीन जाल्लो संगीत कलचो आविश्कार.अभिजात संगितासारकी ह्या संगिताची आखीव अशी थारावन केल्ली रचणूक जाल्ली नासली तरी संगीतशास्त्राचे सिध्दांत पारंपारीक पद्दतीन लोकसंगितांत अंतर्मुत आसतात. अभिजात संगिताप्रमाण लोकसंगिताखातीर संगीत साधनेची वेवस्था(घराणीं),शिक्षक(गुरू),साधक(शिश्य),शिक्षण प्रक्रिया(अभ्यासक्रम) अशे मेजूनमापून केल्ले
