मनोगत
कोंकणी विश्वकोशाचो हो दुसरो खंड हांव व्हड अभिमानान तुमच्या मुखार दवरतां.
थळाव्या भाशांची उदरगत हें विद्यापीठांचें कर्तव्य जावन आसा. कोंकणी भाशेचो विकास करप हो उद्देश गोवा विद्यापीठान सुरवेकसावन नदरेमुखार दवरला. कोंकणी-अध्यापन, कोंकणी-संशोधन आनी कोंकणी ग्रंथ-निर्मीती हो वावर गोवा विद्यापीठांत चालू आसा. विद्यापीठीय थराचेर असो वावर करपी गोवा विद्यापीठ हें संवसांरांतलें एकूच विद्यापीठ आसा.
कोंकणी संदर्भ ग्रंथाची गरज लक्षांत घेवन विद्यापिठान तीन खंडी कोंकणी विश्वकोशाचो प्रकल्प हातांत घेतलो. विव्दानांवांडाच सामान्य कोंकणी मनशाक ताचे निजाचे भाशेंतल्यान ताका संवसाराची वळख करून दिवपाक कोंकणी विश्वकोशाचो खूब आदार जावं येता. जाका आपली भास सोडून हेर भासो येनात, ताचेखातीर अशे थळावे भाशेंतलो विश्वकोश म्हणजे गिन्यानाचें भांडार जावन आसा. कोंकणी विश्वकोश हें भांडार कोंकणी मनशाखातीर आयज उक्तें करता.
तीन खंड हे विश्वकोशाखातीर तशे उणेच. आख्ख्या संवसाराचें गिन्यान तीन खंडांनी आस्पावप कठीणूच. पूण मंडळान व्हडा कश्टान आनी जतनायेन संवसाराचें गिन्यान तीन खंडांनी आटापून घेवपाचें काम बेसबरें केलां. निकतीच वयर सरूंक लागिल्ले कोंकणी भाशेंतलो विश्वकोश निर्माण करप हो भोव जोखीमीचो वावर. अशा वावराखातीर कश्टांवांगडाच त्यागैची भावना आसप गरजेचें. कोंकणी विश्वकोशाच्या संपादक मंडळाच्या कश्टांतल्यान आनी त्यागांतल्यान कोशाची निर्मिती जावंक पावल्या. तेखातीर हांव संपादक मंडळाचें, सल्लागार मंडळाचें आनी हेर संबंदितांचें अभिनंदन करता.
ह्या खंडाफाटोफाट तिसरो खंड तुमचे मुखार रोकडोच दवरपाचो आमी संकल्प योडला. तोय पुरो करून कोंकणीकडची आमची लागणूक कांय अंसान पुरी करूंक सोदतां.
पयल्या खंडाप्रमाण ह्याय खंडाचें तुमचे कडल्यान उत्स्फूर्त स्वागत जातलें असी आस्त बाळगितां.
गोवा विद्यापीठ -डॉ. बाळकृष्ण सोंदे ताळगांव – गोंय. उपकुलगुरू
30 ऑक्टोबर 1997.
डॉ. बाळकृष्ण सोंदे
उपकुलगुरू
