—Sta' sgarrannu, dissi lu solitu Pispisuni. Anzi cci liannu livatu lu suverchiu chi cci junceru li monachi, e ch'era straniu a lu disignu, riducennula a la simpricitati d'origgini.
Muscagghiuni—Zittu tu, nun parrari, cà si' cchiù sceccu e cchiù prusuntusu d'iddi!
—Senti; cci dissi lu Griddu a lu Pispisuni. È veru ca cci hannu livatu chiddu junciutu ddoppu; ma chistu nun 'mporta ca nun fu un vannalisimu; pirchì li junti chi cci ficiru li monachi, spinnennucci dinari comu l'acqua, nun sulu ca cci 'ncasiddavanu a maravigghia, ma facìanu rilùciri cchiù assai l'anticu. E appuntu pri sti junti dda crisiulicchia avìa addivintatu 'na giujcedda; quann'era tutt'addumata poi era 'na vera musìa.
E 'ntra tanti cintinara e migghiara di furisteri chi l'hannu vistu, nun cci ha statu nuddu, tranni di quarchi sceccu quasatu e vistutu, c'ha dittu, ca sti junti nun cci sidìanu boni. Anzi lu stissu Rénan, e dicennu Rénan haju dittu tuttu, quannu vinni 'n Palermu, e vitti la grossa bistialità chi vulìanu fari, si li 'ntisi acchianari tutti, e, sdignatu, cci dissi, chi nun s'arrisicassiru a tuccalla di com'era, pirchì l'avirrìanu sminnatu.
Ma fici com'a chiddi, chi vônnu lavari la testa a lu sceccu; 'nfatti, sti duttura di quattr'a mazzu, c'hannu la testa cchiù dura di li scecchi, appizzaru li pedi, e la sminnaru, dicennu, ca lu facìanu pri amuri di l'arti!?
Muscagghiuni—Chi arti di brigghiu mi va' cuntannu! Lu fannu pirchì dicinu ca li cresii antichi su' megghiu stari chiusi chi aperti, e li rifannu pri pariri antichi cu li mura frischi frischi. E chista si chiama antichità nova!!
Griddu—Pacenza cci vôli a li burraschi.... Chista è l'epuca!... A l'antichi l'assummanu pri barbari, e spincìanu ddi gran chiesi, chi su' 'na maravigghia a guar-
