— 41 —
das kämels omik no äkanoms polön fledis nog vetikum.
Nag ifledoms kämelis jöls valik, dervid äsumom nog se gef golüdik bökili, keli äpokom, nag ijonom kopanele omik, das äninöfom te leüledi; täno äkikom denu ningoli; älüvoms nebeli; alim äsumom kämelis fols ed äteiloms.
Ven äbinoms in fag anik balim de votim, Abdalla pästigom denu fa desidam, Divs so mödik, ätikom, no pöfüdoms dervide; ikanomöv givön obe kämelis nog bals; omobob ome atosi.
Sikod ägevokom omi, äbepükom dini ke om, e vo, dervid ägivom ome vilöfiko kämelis bals.
Befulam fovik vipa omik äningifom ome desidi säkön kämelis nog bals.
«Nims so mödik», äsagom, «ogivoms ole ba töbis; i fled, kämelas tels osätom ba ole».
Lesuno isuädom dervidi gevön begi telid oma.
Nu imütomöv binön kotenik, ab desidam oma ämödom ko lab alik. Äspälom ni flätis ni vödis löfik, al suädön dervidi givön ome kämelis nog bals e fino kämelis bals lätik, ed äbinom legälik, ven man gudik ägevom i begi at. Nu älabedom denu kämelis jöls oma valik. Dervid äkomedom te fefiko ome, mekön de divs oma gebami gudik, givöfik e nobälik.
Monälel äsenitom te nemödiko konsäli at. Sägo desidam omik no nog äbinom pesatöl. Ämemom bökili, keli dervid ipokom so kudiko, ed äniludom, das labed on ämüton labön völadi gletik, bi divs votik valik pigivoms ome so vilöfiko.
Sikod äsludom getävön nog balna al säkön ome bökili. Ädesänom sägo, if dervid änevilom givön bökili, mutön omi alos! Ed eko, dervid gudik ägivom ome i bökili, bi no ävilom mekön nepüdi dem smalöf somik.
