Apang ano'ng madangat sang lanubong' wa'y palad?
CORNELIO. Mabuhi siang' kuhaon sa luyo sang amay 'ya
Kag sa iya pagsimba sa aton mga diwa,
Mabalik sia tungod sa pagdayaw ni Adriano;
Labot pa, nga si Adriano may isang' taga-Atenas,
Nga may pasahing' kaalam kag dunang' kinaadman,
Matanlas, makabuyok nga magpangatarungan
Nga mabudlay nila sia nga pagasumpungon,
Kag sia lugpayon niya sa iya pamulongpulong,
Nga sa ulihe mauyonan na niya'ng magsunod...
Kag malayo sa amay 'ya indi takos mahimo
Sa pangabay mamatok kag nga ang kamatayon
Iya gid pangitaon; buang sia, sa among' handum.
METELO. Mabuhi pa si Flavio?
CORNELIO. Wa'y ina sa bungog ko!
Kay diutay gapamatok sia sa akon mga tuyo.
Si Eustaquio amo ang nagasumpong sa akon,
Mapatay sia upod kay Tito di madugay
Kon dayunon ni Adriano ang iya tinutuyo.
METELO. Tungod sa ila, tutuo, gabatyag ako'y kaawa!
Kag ginasakoan mo'ng kamatayon sang kailo nga mga kriminal?
CORNELIO. Kon sila kriminal
Ngaa nga padugayon ang ilang' kamatayon?
METELO. Ang langit nagaapin sa mga kristuhanon!
CORNELIO. Langit!
METELO. Wa'y mo makita sa kay Tito ina?
Sin-o'ng makapugong gutom sang mga sapat
Kundi ang kusog lamang sang labi ka gamhanan?
