This page has been validated.
LEONIDO. O! Indi gid!
SATANAS. Nakita mo’ng gahum ko’g kusog?
- Ang gamhanan nga mga kalag
- Nga sa kalibutan nagahari,
- Nagatuloman sa akon tingog;
- Sunda’ng akon banlog nga hayahay;
- Pamati sa akon: kon mapailubon
- Talikdan mo’ng bag-o nga pagtuo,
- Kag may hinulsol, sa akon dambana
- Sa daku nga paghandum maabot ka,
- Hatagan ta’y palad, kalipayan,
- Kag imo na’ng imo ginahandum:
- Suba nga sa tiil mo gadalagan,
- Gaganoy sang dyamante kag mutya;
- Ang hangin nga imo ginaginhawa,
- Diin galupad linibong’ pispis;
- Inang’ mga balay kag lagwerta,
- Mangin imo kon sa gilayon
- Sikwayon mo’ng bag-o nga pagtuo
- Kon pakalauton nimo’ng ngalan
- N’ya nga ining’ pandot sa iya nahalad;
- Apang, kailo kal kon sa pagsumpong
- Maghandum kang’ di magtuman sa akon.
- Kay sa tiil mo karon nga daan
- Mabukas ang mahigko nga duta,
- Nga ilubong ka sa iya tigalbong,
- Subong sang paglubong sa balas
- Sang diutay nga tinulo sang tubig
- Kon ang tanum layungon sang adlaw.
LEONIDO. Wa’y pulos nga buot mo ako pasudlan
- Binuang nga hadlok sa imo hambal;
- Wala sing pulos nga magdumdom ka
- Nga ako mabihag sa imo pagtuo;
- Di mas-a’ng anak nga kristuhanon
- Nga mapahadlok sang panulay,
- Sa atubang sang Anak ni Maria
- Ang dayon nga Impyerno nagakurog.
- Kalag nga butigon!
- Lakat, layas ka sa kadudolman,
- Didto sa puloy-an sang panaghoy
- Kag sa wa’y langan nga kahuloy-an!. . .
SATANAS. Hanti, kay amo ina’ng imo luyag,
- Kinahanglan nga ikaw mapatay:
