This page has been validated.
Kag ang mga katuyom sang puting’ sidlangan
- Maanyag, makawiwili;
- Apang ang imo ngalan, nahagugmaan nga Pari
- Nagahatag sing kuyom sa amon nga mga dughan,
- Diin wa’y katapusan ang kasanag gasilak
- Labing’ makaluloyag.
- Kamot nga maluluy-on sang Diwa isa ka Pari
- Sa imo Iya ginpakita, nga’ng gugma niyang’ putli
- Sa dalan pangabuhi nga mapait nagatuytoy
- Sa amon mahigugmaon.
- Ay! ano ayhan ang linghod namon nga paghimakas
- Nga nagahingalayo sa amon nga mga dughan
- Kon di matuytoyan sang kamot mong’ makugi,
- Sang gugma mo’g kapisan?
- Kami’ng mga anak nimo, Amay, sa amon gatuytoy
- Sa duog sang kapalaran nga wala’y katapusan;
- Kag sa amon panumdoman kahadlok di katublag
- Sa imo pagpanimon.
- Ang daku nga Apostol nga’ng tikang ya kag ngalan
- Imo ginapadayon nga may dakong’ pagsalig
- Sa langitnon nga bulig ikaw ang bugayan
- Sing manggad nga balaan.
25 sa Enero, 1881.
- NAG-ABOT na yadto’ng tion nga malaut,
- Masubong’ nadangat palad kong’ malubha;
- Nag-abot sa ulihe, ang adlaw kag takna,
- Nga ako’ng magabiya sa imo nga hilit.
- Paalam, Leonor, paalam, ako nagapaalam,
- Dughan kong’ may gugma sa imo ko nabilin;
- Paalam na Leonor, ako’ng mahalin,
- Masubong’ pagbiya! ano kasakit!
- _________
(1) Malip-ot kaayo nga binalaybay nga ginhalad, sa wala sing duhadoha, kay Leonor Rivera, nga sinulat sang pila ka adlaw nga wala pa sia makapa-Europa sang 1882.
“Nagaduhadoha ako sing daku nga ini nga binalaybay iya ni Rizal. Indi dapat ibantala nga tunay nga iya.” — (L. Lopez-Rizal)
Wala man masayri kon ang tunay nga huwad sini nga sinulatan makita pa karon apang ginapatihan nga nasunog lakip sa iban nga yara sa Bibliyoteka sang panahon sang paglwas sang Manila sang 1945.
Ang “Poesias de Rizal” ni Dn. Jayme de Veyra may huwad sini nga binalaybay.
