-------------
Ngaa man pangayuon ang mga binalaybay
Nga wa’y pulos sang una gin-amba kong’ may kagha?
Agud ayhan liwat sa akon ipalabay
Ang kadimabaluson kag mapait kong’ kahapon?
-------------
Ngaa pa gid isambit masawing' handumanan
Karon nga’ng dughan nakon luyag nga maghigugma,
Tawgon ang kagab-ihon sa pagyuhom sang aga
Nga dili masayuran kon liwat sia masilak?
-------------
Luyag ninyo masayran kon ano’ng kabangdanan
Sining’ akon pagkagha ukon mga kasakit?
Luyag ninyo masayran ang madamong’ kapait,
Ngaa’ng kalag kong’ linghod sang gugma di nag-amba?
-------------
Kalimti ninyo’y dayon, kay ang ginsugdan niya
Sing kasubo gahatag, apang kahalam-utan;
Sa bangkay kong’ manaog sa kutkot manaog man
Ang isa ka bangkay nga sa akon nalubong.
-------------
Butang nga di mahimo, binuang, isang’ handum,
Ayhan, isa ka gugma, mga damgo sang kalag. . .
Sini nga kinabuhi imna’ng dugos natanyag,
Pabay-ing’ magpabilin batyay nga apdo sa idalum.
-------------
Liwat nabatyagan ko mangitungitong’ landong
Gatabon sa kalag ko sang kunop nga madamol;
Di matahum nga bulak kon di kapin sa bukol;
Sanglit sa iya nakulang ang hangin kag kasanag.
-------------
_____________
(1) Binalaybay nga ginhalad kay Gng. Consuelo Ortiga y Rey, kag sinulat sa Madrid, suno kay Dn. Mariano Ponce, sang ika-22 sa Agusto sang 1883. Nabantala sing nahauna sa RENACIMIENTO, sa Manila, sang ika-29 sa Disyembre sang 1904, suno kay Gg. R. R. Guerrero.
“Ini nga binalaybay ginhatag sang tagsulat kay Gn. Consuelo Ortiga y Rey sang ika-21 sa Agusto sang 1883, gani nga kon amo indi mahimo nga sinulat ini ni Rizal sang ika-22 sa Agusto suno sa sugid ni Ponce. Tan-awa ang mga kaugalingon nga handumanan ni Consuelo nga napetsahan sang ika-23 sa Agusto.” (L. Lopez-Rizal).
Ang Bibliyotekang’ Pungsudnon may iya sang tunay nga huwad sini nga sinulatan. Nasulat sa isa ka panid nga papel nga katalan nga gingamit ang pihak kag pihak, nga ginlagdaan sing isa ka “R”.
Ginbantala ini sa “Poesias de Rizal” ni Jayme C. de Veyra, p. 52 kag subong man sa “Dia Filipino.”
