Page:Mga Binalaybay V.3.pdf/89

81

  Ginapangita ’ya kon diin ang himaya,
 Kag ini madasig sa iya kapalagyo:
 Landong nga sang handum niya gayaguta!....
 Sa sini’ng layaw sa lawod makadto
----------
  Kamot di makita sa iya gatulod
 Magalagaw sia sa baybay kag baybay;
 Mga handumanan sa iya magaupod
 Sang mga palangga sang sia may kalipay.
----------
  Isang’ lungib ayhan sa kahanayakan
 Mangin-hanahay yang’ pugad sang hidait:
 Sang banwa nalimtan kag sang kalibutan....
 Malinong gatulog tapos ang kasakit!
----------
  Kag naila sila sa kailong’ galagulad
 Kon sang duta madasig nga lumakbay sia....
 Ay! dili nasayran nga sa iya kalag
 May yara nga duog nahubsan sing gugma!
----------
  Ang layaw mabalik sa dutang’ tumandok,
 Kag sa iya puloy-an mabalik man sia,
 Makita ’ya na lang ang nagtulupok,
 Kakigas, lungib kag nadulang’ gugma.
----------
  Lakat manoglagaw, ang lakat dayuna,
 Ikaw dumoluong sa aton kaugalingon;
 Pabay-i’ng iban mag-amba sang gugma,
 Iban magkalipay; ikaw magpadayon.
----------
  Lakat, manoglagaw, di magbalikid,
 Kay wala’y mahaya sa imo pagtaliwan;
 Lakat, manoglagaw, lumsan mo’ng kasakit;
 Kay tanan gakadlaw sa kagha sang iban.
----------