Sa mahiwas na bayhayon, nin mayomhok, pínong
baybay,
asin sa poón nin bolod na nalalakpan nin hidyaw,187
payag nyakó itinogdok irárom nin kakahoyan,
sa monínong na kadlagan naghahanap na dalísay,
hingaló sa sakong isip, patonong sa kasakitan.
Hilakong nipá an atop, salog matapong kawayan,
an pagbo,188 mga kabaan, kahoy na di sinapsapán;
háyag na daing halaga kadlaganon kong kubungay189
alágad natatangol búkid na magkagúrang man,
iawitan, hináhapros kan dágat sa banggi, aldaw.
May nagbobolos na sapá, sa malimpoy na kadlagán,
nabolos sa mga gapó, kikarigos nin pagmahal,
nin bulabugak yoyabá kabotongan na magaspang,
na sa banggi na monínong áwit asin kalumbayan,
asin gabóbog na dagá sa kainitan kan aldaw.
Kun matiwasay an lángit, monínong bolos kan sapá,
kudyaping di nakikita daing ontok katutulá;
kundí nádatong an urán asin makosog na bahá,
bato, angpas, linolokso, paas, masobo, ragana,190
nag-oongal na mangirhat, sa dágat minalumbasá.191
Mga binátok kan áyam, hinuni nin mga gamgam,
paas na tíngog kan kálaw an nadadangog lang dumán;
daing tawo na maabhaw, kanátad na masaringgaw,
na sa isip ko sumúlang, tumapá sa sakong dalan;
an harani lámang sakó, an dágat asin kadlagan.
!An dágat, an dagat lamang! mapangyaring
kabilogan,
rapokdapok minádarahararayong mga bagay;
an hoyom sakó nadagka sa pagkaágang malinaw,
asin kun sa pagkahapon pagtubod ko nasasayang,
sa dalitá nya an pusó nátuklas nin aniningal.
_______
- 187 Verde.
- 188 Kaná sa harong.
- 189 Kamálig.
- 190 Baga nagkakalakagá.
- 191 Naanggot.
