Sa pagromdom ako búhay sakong mga minámahal,
nagtataga kamaté kong hihilwas saindang ngaran:
mga gadan na su iba, kan iba ako liningwan;
alágad anó kaiyan?...Sa lihis ako man búhay,
asin kan nakalihis na dai sakong makaágaw.
Dayúpot nyákong katóod na di sakó nagbibihang,
na nagraranga sa kalag kun mamondong namamasdan,
sa bangging purísaw ako sa pamibí ko nadámay,
kaiba sa sinobolan sa payag ko nag-érok man,
iyong nataong pagtubod kun borong man an kagabsan.
Uya, hináhalat nyákó na sumaga sarong aldaw,
na an sa hayop na kosog malúpig kan Kaisipan,
matapus pakikibaka, inánay na paghingagdan,
sarong tíngog an mádaging na orog pa kamalumbay,
makakanood omáwit nin áwit na matagumpay.
Nakikita kong masaga, makintab an kalangitan,
síring kan pinaglalalang énot kong pangatorogan,
kan dati na hoyophóyop mamondong ángog hihadkan,
su dáting nagpakarab kan maláad kong hudyatan,198
minapasulwak kan dugó nin langóbong kaisipan.
Nasisinghot ko an símuy na, sakalé, luminabay
sa mga langtad, sa sálog, tinubuan kong banwaan;
binábalik gayod sakó pigkatiwalá kong túnay;
su mga hadok, hagayhay, linalang na minámahal,
mahamís na pagtiwalá nin mabiní na pagmahal!
Pagkakita ko kan bulan, na kaidto baga pírak,
su dating kalipung-awan nagbalik sakong mamondag,
riboribo na giromdom, pagmamahal ngáning labat
sarong patyo, azotea, baybayon, salagísag,199
daing-girong, hinagayhay, panghihimulang banáyad.
Napapáhang alibangbang nin liwánag asin kúray,
na sa ibang gáyong lángit sadyang nangangatorogan,
langobó pang nagtalikod sa bansá nyáko, pagmahal,
saén man nalalagálag, daing tákot, daing handal,
sináyang sa dapleng dagá kahagbayonan nin búhay.
- 198 Entusiasmo.
- 199 Enramada.
