— 16 —
AN PAGKABIHAG ASIN AN TAGUMPAY
Poók nin Montilla kan magkaparárad,
Si Abencerraje nangahas omagyat
Sa taga Castilla, mga daing gúlat,
An saindang dahas pasokoon nanggad.
Conde de la Cabra tolos dominatong,
Dara man su batbat takyag na marígon,
An kahalimbawá iyan Kagadanon,
Na nagpapalakop landong daing sókol.
Nadagósong gayo, león an kabágay,
Sa mga hokbo man láhing bakong banal,
Ni Don Diego baga sya inibanhan,
Halat na bulanos an bag-o na aldaw.
Síring nganíng gayo pagdulag nin libay,
Matulin na paná pírit naglilikay,
Nin huli sa tákot nin púsong maabhaw,
Pangkat kan Profeta síring pagdulag man.
Kundí bakong síring mga kabayohán,
Atá ginigíbong kalásag an daghan,
Madahas na gáyong sisabat an íwal,
Sa pakiberangtas" mapagbasangbásang.
Kadto ni Boabdil didagka an pangkat,
Na sa ongot-óngot biyong naglaláad;
Itong barongbarong sa lawog nasúrat,
Mapúsong nagtaram sa mga durulag.
"Isasaen kamo, mórong daing pálad,
An mangmang na tákot, nabútang banáyad?
Dulag kamo kisay, mga napahámak,
Marigon na pusó laban di nátalad?"
Matapus pagtaram, bodyong pinatanog,
Su mga samuyá asin nag-arabot;
Tolos na pinonan ralaban makosog,
Sagantik nin batbat sadyang nadadangog.
- 72 Pangkat ni Mahoma.
- 73 Pakikombate.
- 74 Su samong mga tawohan.
