Banggi kaito, makosog su doros,
Sa mga torreng halangkaw paghadok nahagosihos,
Na makariribong sangribok na ribok,
Sa saiyang mga pakpak, mamondó, dara pagláyog,
Katiwasayan gigibong malipungaw kan pangánod,
Kan talá na mabansay banggi na makatatákot,
Sarong manipis na kúray, baga maambon na suklob,
Na sa mga pangomahon lubós na nakakatáhob,
Pangomahon na saén an kastilá minabátay.
Na torreng sa moros duman sa halangkaw,
Botbot naghuhúning gayo duman nanggad sa ibabaw,
Mga maraót na dai nin bílang, mga madudugó na pakipagiwal,
Sa tingog na makagiram totoo na nagtutúyaw.
Alintanang naghahanap sa malolómoy na atop,
Na ginibo sa gáding nin moro pinayomhok,
Kapahingaloan ni Abd-El-Azis na maísog
Sa nagáging aldaw kagianan na sayod.
Sa mga tripodeng pírak, suave na kamangyan,
Kan arabiánong tinanom itinatagdong dalísay,
Naglaláad, napalakop, makalalangong alímay,144
Euáveng kaalingan nin mayaman na lalamban.
Gabós matóninong, gabós natotorog,
Dai kundi lang su moro an mamondong nagtatánod,
Pinaghilinghíling su liwanag na sáyod,
Na nalagbas sa tihantik145 dungawan na gasogok,146
Kundí pananalé lámang, nakitang luminadawan
An saró man na anino, mapapagborongborongan,
Na kan liwánag nganí na mabansay
Sa nagkapirang hidalé bilang baga idinuyan,
Sa lalaki na panglawog garong gáyong suminírang,
Turbanteng maputi su payo naarikosan,
Su halábang barrabas sa lawog nataong buhay,
Sarong tikó na alfange sa hagkos nya nabibítay,
Nin dugong maínit nagtatadong túnay,
Binagting bagang mamondó kaiyan batíngaw,
Na ikinamondong gayo sa tawo na paghingagdan,
Asin su saiyang tingog moninong bagang linobngan
Nakaribaraw na gayo, asin sa moro pakita malipungaw.
_____
- 144 Mahamot na párong.
- 145 Elegante
- 146 Binonay, ovolado.
