!Pomaduman kamo sa sakong banwaan,
mga dapleng kaburakan 163,
itinaranom sa dalan
nin saró na naglalakbay,
asin sa tangod kan lángit nyang bughaw,
na nagíingat kan sakong mga pagmahal,
ibaretá nindong túnay
kan himanwa an pagtubod na dalísay
na napakosog sa buhay,
dahelán sa dagang saiyang nabuhayan!
Lakaw, saindong sabiha
na sa énot na pagbuka
kan saindong himúkol kaiyan daliwawa,
sa may Nectar na malípot,
sa katáid nindo daing gimokgimok,
pinagiisip su dánay,
langobó na pagkabuhay.
Sabiha nindong kun an símuy,
na kan saindong amyo minahab-on,
sa pagkawat kamo hinihinghingán
mga awit nin pagmahal,
sya 165 nagtataram man nin lúhay
mga awit nin pagmahal sa rogáring nyang panaram;
na kun kan talá-ínit pagkaágang háyag
kan Koenigsthul an alitoktok pinapakintab
asin kan maromarom nyang banáag
minátaong buhay sa langtad,
sa kadlagan asin sa tanáyad,
!an talá-init na iyan patarataraha,
pati sa saiyang daliwawa,
an sa saiyang bansá sa luntokan nagsasaga!
Asin iósip nindo itong aldaw,
na kamo pinopodó man
nyakó sa gilid kan dalan,
sa may mga rogmok kan castillo feudal,
sa may pangpang kan Nectar,
sa malipungaw na kadlagán,
ibaretá, ibaretá nindong túnay,
_________
163 Mga burak na bakong katutubó.
164 An kabilogan kan búrak.
165 An viajero.
