BU HNIHNA (1947)
Thuhmahruai
Tunah hian Mizo Chanchin bu 2-na tur chu ka lo ziak zo leh thei ta a, ka lawm hle mai. Kumpino Sawrkarin Mizoram an awp chhung thu a nih avangin Mizoram puma roreltu Bawrhsapte chu thu tlangpuiah ka hmang deuh zel a ni.
Mizo khaw mal malte leh lal mal malte chanchin ziak sên a nih dawn loh avangin a ram pumpui chhunga roreltu Bawrhsapte chanchin chu thu thlangpuiah tha tawkin ka ring a; chuvangin Bawrhsap mal mal hnuaia Mizo ram ṭhan dan leh danglam dante chu No 1,2,3 in ka chhinchhiah hrang zel a ni.
Mizoram kum 56(1890-1946) chhung chanchin a ni a, hun tawi te a ni chungin, chanchin zawng zawng chu hriat kim sen leh ziak sen pawh a ni lova, a tlangpui takin, tawi te tein ka ziak a ni. Mi ṭhenkhat duh tawk chu a ni lo hlein ka ring, kei ka duh tawk pawh a ni lo va, ka ziak thiam tawk leh theih tawk a ni chauh zawk a ni. Ka ziak dik loh deuhte pawh a awm ka ring a; chu'ng atan chuan tupawhin min ngaihdam ka dil e.
Kan Mizo hotu, Pu Sainghinga te, Pastor Challiana Lunglei te, Pu D. Thianga te, Pu Thanga te hian chanchin thenkhat min lak khawmpui hlawm avangin lawmthu ka sawi a. Kan pu Bawrhsap, Pu A.McDonald-a pawhin min endiksak avangin a hnenah lawm thu ka sawi bawk a ni.
Liangkhaia Saitual, Dec.1946.
