CHHUAHTU THUHMA
Rev. Liangkhaia ziak Mizo Chanchin hi a vawi li-na atan 1976 khan Mizo Academy of Letters-in an chhu a, kawpi 4000 siamin an chhuah a ni. Kum 25 lai a lo liam leh tak avangin a bu hi hmuh tur reng reng a awm leh tawh lo va. Mizo History ziak reng reng zinga a hmasa leh chhut chhuah hmasak ber a nih avangin mi tam takin behchhan berah an nei lo thei lova, a bu chhiar tur a awm tak miau loh avangin tunhnaia mithiam lo chhuak thar zelte hi chhuan han rawn ngaihna pawh an hre ta lo a ni ber mai. Kum 50 ral kai chin hote hi chuan, 'Kha lehkhabu kha chhut leh dan a awm law'maw ni le?' an tih deuh reng ṭhin avangin engtia tih tur nge ni ang tiin ngaihtuahna kan seng chho ve reng a.
A bu neitu nihna hi Mizo Academy of Letters kutah a lo awm tawh a, chumi chu hria in, leh ka pu (Rev. Liangkhaia) khan a lehkhabute hi enkawl zui tura min tih avangin a neitu nihna (Copyright) pawh kawl leh ngei turah ka inngai a. Tichuan, Mizo Academy of Letters-ah chuan lei lêt leh ka dil ta a. MAL hruaitute pawh chuan ka dilna rilru leh thil awmdan min hritthiampui avangin avangin ka pu an lo leisakna zat chiah Rs.2,000/- bawkin a Copyright chu min lei lêttir leh ta a ni. Hetianga lei lêt min phalsak avang pawh hian ka lawm hle.
Lehkhabu chhut hi a lo namai lo hle thin. He Mizo Chanchin ngei pawh hi Computer-ah chuan kar lovah kan han khung zo mai a. Amaherawchu, a bu tam tham siama han theh darh ṭhah leh tur chuan a singbi fê sen a lo ngaih leh tâk avangin kan tithei mai lo va. Mizoram Publication Board-ah lehkhabu hlui kum 15 chin mipui vantlang tana ṭangkai tur bik chhutna dil theih a ni tih hria-in, ka'n dil a. Amaherawchu a vawi khatnaah min phawlsak ta lova, kum 2001 tawp lamah khan bei nge sei run dung tiin ka'n dil nawn leh a, min lo phalsak ta lhauh mai a, a lawmawm hle mai. Chutianga ṭanpuina ka hmuh tak avang chuan tunah hian he lehkhabu hian khaw êng a rawn hniu ve leh ta a ni.
