MIZO CHANCHIN
A bu chhut chungchangah hian ngaihdan inkâwlkalh tak ka dawng a. Kan mithiam ṭhenkhat chuan a tir ami ang thlapin engmah tidanglam lova chhut ṭha berin an hria a, chutianga chhu ngei tur chuan min fuih bawk. Amaherawchu, mi ṭhenkhat dang erawh chuan, kum 1976-a lo chhut dan ang ngei hian chhut leh ni se a ṭha ber ang, an ti bawk a.
Chu ngaihdan pahnih siamtu lian deuh ber nia ka hriat chu Zoluti lakletna hmun Sailam nge Kawlri tih chungchang hi a ni a, chu lai chu thil pawimawh tak a ni reng a. Mi tam tak chuan a khawi zawk pawh ni se engnge pawi? an ti mai a. Mahse, kan hriat angin mi thiamte thu inchuh ṭhin ho ho tê anga lang hi a lo ni ṭhin si a, chuvang chuan ngaihdan neih thiam a har hle.
Keini ang duang, Mizo hnam chanchin chhui lêt thui thiam lo tan chuan khawi zawka keuh tur nge tih hriat thiam a har khawp mai. Amaherawchu, amah Rev. Liangkhaia khân chhut khatna thuhmahruaiah khan heti hian a lo ziak a. Tin, thing leh raw innawh lai chanchin te pawh mi hrilhtute sawi ang ang chu ka ziak zel mai a ni a, a lo dik loh deuhte pawhin keia thiam loh a ni lo vang a, mi hrilhtute hriat dan dik loh deuh vang a ni zawk mai ang. Hriat dan hrang a awm tih hi ka hre reng a, hriat dan zawng zawng ziak sen a nih si loh avangin a dik tawk awm deuh apiang chu ka la zel a ni. Tih ṭhat leh ngai apiang chu chuht nawn leh hunah ka ti ṭha zel ang e', tiin a lo ziak diam a.
Chu lam hawi chu sawi chhunzawm zelin, thil thenkhat mi hrilh dan chi hrang hrang aṭanga a dik ber ni awma a hriat a lak mai chu dik tâwk lo pawh a awm a ni ngei ang. Kum 1948-a chhut hnihna an chhuah ṭum pawhin,'...Thil hi tihthat famkin a har ṭhin a, a dik lo deuh hmuh chhuah turte a la awm chuan tun hnuah pawh kan la tiṭha leh zel anga,...Mizo ṭawng ziak dan thar anga ziak ṭhat a ni ta a', tiin a lo sawi leh a.
Tin, Mizo Chanchin bu hnihna thuhmaah,...Mi ṭhenkhat duhtâwk chu a ni lo hle-in ka ring a, kei ka duhtâawk pawh a ni lova, ka ziak thiam
