Bung-I
CHHUIDAWN THU
1.(1) Mizo lo pianna bul: Mizo chanchin hriat chian phâk loh, kan ngaihruat theih hla berah chuan, Baibul zirtirna thua Nova fate pathum zingah khan Japheta thlah zinga mi chu kan ni awm e. Chumi hnuah chuan lo chhui zîm deuh ila, Mongolia mite thlah, Mongolian Race an tih hi kan ni leh ang a, Chuti kan ni tih chu kan hmel put dan, kan biang ruh bâwkzia-ah te, kan chal têtzia-ah te, kan hnâr ngul hniamziaah te leh kan hmai charzia-ah te leh kan taksa ruhrel indin chhuahzia, mi tawi leh mi sanghet lanlawn kan nihzia-ah te hian a lang a ni, an ti. Tin, chuta ṭang chuan lo chhuiu zîm lehzual ila Mongolian thlah zingah pawh chuan Tibeto-Burman an ti pâwl zinga mi hi kan ni leh a ni.
(2)Chhinlung chhuak:-(A.D. 900 vel) Mizo upa titiah chuan mihring hi Chhinlunga lo chhuak ni awmin an sawi thin a, mahse Chhinlung an tih chu lei kua lung phêka chhin ni awmin an sawi a, tun hnua ṭhenkhatin China titi an sawi nên chuan a ngaihzawn theih hle awm e, Chu titi chu heti hian an sawi:
Hman lai A.D.750 emaw lai tawhah khan China lal Chhinlunga chu a pa nên an inngeih theih loh avangin mi tam fe hruaiin a chhuak a, Burma rama “Awksatlang” an tihah hian khua a siam a. An lo pung a, an tam ta hle mai a, mahse ama dam chhung chauh kha a ni a, a thih chuan a khuate chu an lo ṭeh darh leh zo ta a; chu mi khaw chhuak zawng chuan "Chhinlunga" chhuak an inti a ni, an ti a. A ngaihzâwn theih hle mai. Chungte chu tuna Chin Hills a chengho te, Manipur ram mi te, Mizorama mi te, Satikang tlang ram a mite leh Cachar tlang rama mite ho hi niin an sawi. Hei hi titi zawng a ni na a, ngaihzâwn theih tak a ni a, thutak pawh a ni mai thei.
