Mizo Chanchin
3. Kan Ram Luah Hmasatute: (AD 900- 1500)
He ram hi a leilung awm dân ngawt hi enin, tun lai mi thiam, leilung chanchin zirtute (Geologist) chuan ram thar a ni, tuifinriat hnuai ata a lo pâwn chhuahna a la rei lo vang, a lungte rêng pawh hi a la no êm mai an ti a; nimahsela, hnûhmate kan chhui chuan upa vê tak ni awm chuan a lang. Pathianin mihring hmasa her Adama a Siam laiin he ram hi khawmual a nih tawh leh tawh loh chu kan hre chiang lo na a, lung hriam hman lai (Stone Age) an tihte hi chuan a awm ve tawh a ni tih a hriat hle mai. Chutichuan he Mizorama mihring sûlhnû kan chhui theih zawng zawngte chu hêngte chauh hi an ni:-
(1) Lung hriam hmangtute:
Hengte hi Kolarian mi chu an ni kher lo thei e. He mi ram tlawh pawptu hmasate chu Tibeto-Burman mi an ni ang tih chu a rinawm ber a ni.Engpawh ni sela, a awm hmasate chuan lung hriam an hmang tih chu a lang a ni. Keini Mizo ho awm chin-ah hian chung lung hriamte chu kan chhar fo va, Mizo ngawt chuan kan hriat loh avangin, “Têk” kan lo ti mai thin a; nimahsela kan ramah Sap te, mi thiamdangte an lo kal a, hmasânga mite hriamhrei a ni tih min hrilh ta a. ‘‘A ni dâwn tak" kan ti ve ta chauh a ni.
Mizovin kan chhar her ṭhin chu hreipui tah tawn ang te, tah tawn loh ang te an ni deuh ber a, chemtê ang deuh leh fei lû ang deuh chharte pawh an awm a ni, an ti. Eng ang pawh ni ta sela, a pawi lo va, chûngte chu mihring siam an ni ngei tih kan hriat avângin he ramah hian chutiang hmangtute an lo chêng tawh a ni tih min hriattirtuah chuan a ṭha tawk ṭheuh a ni.
(2) Meitei:
He mite hi an zavaia an awm loh pawhin a ṭhen tal chu Mizoramah hian an awm tawh tih a hriat hlê mai. Lung phêk chungah te, an lehkha a la chuang a, ram ṭhenkhatin an hming a la pu. Tuikhur atâna lung ker
