Mizo Chanchin
6. Paihte
(1) Vuite:
Anmahni sawi dan tak chuan Vuiteho hi Ni zung aṭanga piang kan ni, an inti a. Thahdo mi Aisena pa huana thing kawrawngah tui pahnih a lo awm mai a. Pakhat chu Aisena pa chuan a chhum a, a kha viau mai a, pakhat chu kawmchar lapâr pâ-ah a dah a, ni zungin a zuk chhun fo ṭhin a, a lo keu va, hmeichhia a lo ni a, chu chu ni zung vēkin a râi leh a, Lamhleia a lo piang ta a, chu chu Vuitê lal thlahtu a ni, an ti a ni.
Thahdo ho sawi dân erawh chuan Thahdova unaupa Dongela hian an famu ngei a lo rai a. A zahthlâk êm avangin an sawi ngam lo va, a lo pian pawh chuan huana thing kawrawngah an va dah rawk a, ni hnih ni thum laiah pawh a lo thih tak loh avângin an la leh a, an enkawl ta a, "Tuia lo awm a kêu a ni,” tiin an puang ta mai a ni, an ti.
(2) Dapzar Paihte:
He mite hi a tirah chuan Vuite hawk an ni a. Run râla an awm laiin an lal pakhat, a hming Sianthuma an tih chuan a u inpui zawk Kumrova a tai rawk a, a hneh ta si lo va. Chu mi lai chuan Rûn râlah chuan Thingpui tâm an tih hi tâm nasa êm êm mai a lo awm hlauh hawk a, chuvangin Sianthuma ho chu an low awm ve thei ta lo va, thlang an tla ta a.
Durtlângah khian Palian lal Bulpuia te, Pubuara te an khawm khâwm chiam a, chu mite chu an bel ta a. Palian ho thlang tlâknaah an tel ta a, khutah chipui tlângah an awm laiin Bulpuia tupa Bâka hovin Keihâk tlangah an kai dawn a, dâpzar hnuaiah a zuk rûb a, a man chiam a, dâp zar hnuaia an lo awm avâng chuan an dêu nân, "Dâp zâr Paihte" an ti ta a ni.
