asal-molana apanapa Sang Radjhǎ panèka ma’ èangkep, kabit ḍǎri ḍǎ'-aḍǎ'èpon perrang.
Èseddhi'na koṭṭa Lymington, ta’ djhǎoe ḍǎri Titchfield, Sang Radjhǎ ngongsè ḍǎ’ sèttong alas, sè ènjamaè Alas-anjar, mongghing èpèngghirrǎ telloe’ Southampton; pèngghir lao'na Alas-anjar ghǎpanèka abǎtessan sareng sèttong tana, sè ènjamaè Arnwood, kaaghoengannèpon goel-agoellǎ sarḍǎḍoe djhǎrǎnan, anjama Beverley. È bǎkto ghǎpanèka manabi orèng ghǎdhoèan tana, kèngèng ènjamaè ghǎḍoèan sèttong bhǎrǎng sè saklangkong larang arghǎna; sarrèna tana ghipanèka abǎtessan sareng Alas-anjar, dhǎddhi kèngèng angghep bǎgiǎnna Alas-anjar. Towan Beverley, èngghi panèka soebǎt kenṭella Pangèran Robert, djhoemenneng Kornèlla bhǎlǎ-tantraèpon Sang Radjhâ. Pangèran Robert bhoeroe kaalok kabǎngalannèpon. Saabiddhǎ Beverley aperrang, mosṭè ngapèngè Pangèran sè bǎngalan ghǎpanèka, kantos bekkasanna èngghi sèdhǎ neng-è pangkoanna Pangèran, nalèka aperrang è Naseby.
Katjatora njonjana Kornèl Beverley panèka asal toronna Villiers; sareng Kornèl Beverley ghǎḍhoeǎn pottra pa-empa’, lakè’ ḍoewa' binè’ ḍoewǎ’. Kornèl Beverley ghǎpanèka saklangkong trèsna ḍǎ' njonjana sareng ḍǎ’ tra-pottrana sè kaempa, anangèng sakèng bhǎdjhengnga sareng manteppa ḍâ kawadjibhannèpon, saabiddhǎ aperrang megghǎ’ katrèsna’anna ghǎlina ḍǎ’ pottra radjina, nalèka ghǎpanèka èdhingghǎllaghi è Arnwood. Kabhǎr sèdhǎna Kornèl marentek ghǎlina njonja Beverley; bǎtara pan-saponapan boelǎn abittèon ḍǎri ghǎpanèka, njonja Beverley adhingghǎl dhoennja djhoeghǎ, pottrana sè kaempa mangkèn ko’ong boenter. Ontongnga na'-kana' ghǎpanèka bǎḍǎ sè arabǎdhi, èngghi panèka tarètan binè’na njonja Beverley, orèngngèpon ampon towa.
Kadhi sè ampon kasebbhoet èattas, kabǎḍǎ’ǎnna naghǎrǎ è bǎkto ghǎpanèka ta’ djhemdjhem, mala sanget roesoena; mongghoe ḍǎ’ Sang Radjhǎ, ponapa polè ḍǎ’ èn-laènna, saklangkong bhǎbbǎdjǎna; na’-kana’ ko'ong kaempa ghellǎ' lagghi’ pagghoen èrabǎdhi bhibbhi’na è Arnwood.
Ghi’ djhǎman kona para rato panèka pada tjè’ kasokanna amamolan. È kala sèttong arè, prappana abbǎbhoeroe neng-è Alas-anjar ghellǎ’, pottrana Rato Willem sè Mennangan (1), sè anjama Willem Rufus,
(1) Mèlona ènjamaè Willem sè Mennangan, marghi sèpat aperrang mennang. Radjhǎ Willem sè Mennangan panèka talèbǎt kerras, nangèng talèbǎt adhil.
