kaḍǎlem alas, pas terros lang eommon. Jakob sareng onèng, manabi mandjhǎngan sè ètèngghǎrǎ boeroe, pas onga’; ta’ abit ladjhoe nèngalè sarḍǎḍoe bǎnnja’ paḍǎ nompa’ djhǎrǎn, ngombǎr ḍǎri kennengngannèpon mandjhǎngan sè aghǎmbi’ rebbhǎ ghellǎ’. Saddjhegghǎ Jakob ghi’ ta’ onèng nèngalè sarḍǎḍoena Parlemmèn, amarghǎ ḍoe-sarḍǎḍoe ghǎpanèka ghi’ ta’ onèng rassana abhǎris ka Alas-anjar, kadjhǎbhǎ sakalèan ghǎpanèka. Angghoejjǎ ḍoe-sarḍǎḍoena Parlemmèn abǎnnèan sareng angghoejjǎ sarḍǎḍoe karadjhǎ’ǎn, èngghi panèka: songko'na èkabhǎḍhi ḍǎri bessè sareng kalambhina ḍǎri kolè'na kerbhoej. Ta’ abit ḍoe-sarḍǎḍoe ampon semma’ ḍǎ’ bhoet-ombhoet, pangètekkannèpon Jakob, sarta pas paḍǎ amboe èghika'ijǎ, sareng Opsirra èpèntaè paḍǎ toron ḍǎri djhǎrǎnna. Jakob saloè ta’ aghoeliǎn, makettek bhisaos, sabǎb tako’ èpangghi ḍoe-sarḍǎḍoe sè paḍǎ adhǎrǎp è seddhi’na ombhoet. Ontongnga ombhoet panèka djharembhen, kantos ḍoe-sarḍǎḍoe ta’ njangka, manabi èḍǎlem bǎḍǎ orèngnga. Jakob pas njornè’ ḍǎri pangètekkanna, nèngalè ḍoe-sarḍǎḍoe ghi’ prappa’na ngessot pellona djhǎrǎnna. Pèkkèrra Jakob sapanèka: ,,Sèngko’ rèja bhǎbǎ: parèntana Sang Radjhǎ. Mon sèngko’ èkataoè bi’ ḍoe-sarḍǎḍoe rowa, amè-amè’ pas èpègha’ sarla èsèksa, amarghǎ sèngko’ èangghep mosona.” Jakob nèngalè Opsir kasorang, dhekdhegghǎ sodhek tor gǎnṭeng, njambhelloet ḍǎ’ lè’èrra djhǎrǎnna, Robǎèpon opsir ghǎpanèka seggher, (bhegghǎr), sanarè pellona ngerraj; anangèng sarḍǎḍoe laènna paḍǎ lojloj, amarghǎ kalessowen.Pangèrana Jakob, Opsir ghǎpanèka pangradjǎna. Ta’ abit Opsir pas aparènta ḍǎ’ ḍoe-sarḍǎḍoena: ,,È; tja-kantja kabbhi, sènga’ lǎ, ngessot pellona djhǎrǎnna djha’ bǎn-sarombǎn, krana kèbǎn ghanèko bannja’ pètolongnga, bǎn polè dhika kabbhi taoa, djhǎ’ boelǎ èko’into tjoma boe-amborǎ satengnga djhǎm abiddhǎ. Mon pon marè lesso kabbhi, maḍḍhǎ pas dhoeli paḍǎ mangkat polè.”
Saamponna Opsir marè aparènta sapanèka, pas bâḍǎ sarḍǎḍoe kasorang mator: ,,Sapalèna orèng ngotja'aghi, tja’na alas anèko landjhǎng bǎn lèbǎrrǎ pan-bǎrǎmpan eppal. Tja’na mon boelǎ sakantja posang èko'ijǎ, pas ta’ nemmo bǎt-bǎdhǎn. Djhoeghǎ èko’ijǎ bǎḍǎ kantja sè tao ḍǎ’ ka'-lekkè’na djhǎlǎn è alas nèko, engghi anèko James Southwold. Abǎ’na tao akandhǎ, tja’na bilǎn dhaddhi tokang djǎgǎna alas anèko; sarta polè abǎ'na lakar èlahirraghi sarta wa-towa èko'ijǎ, ta’ engghi James Southwold?”
