.—Ginoo!...— mitubag si Maria Clara nga nagpangurog. Ang Kapitan Heneral nakatag-an sa buut isulti sa dalaga, ug miingon:
—Maayo uyamut, inday, nga ikaw mahimuot na lamang sulod sa imong kasingkasing ug sa pagmahal kanimo sa imong mga katagilungsod: sa akong bahin mao kana ang labing maayong ganti ug dili na unta angayan nga kita mangayo pa ug lain. Apan ayaw ako kuhai sa maayong higayon aron pagpakita sa kadaghanan nga kon ang Katarungan maantigong mosilot, maantigo usab nga mohatag ganti ug dili siya kanunay “buta”.
Ang tanang mga pulong gitaliwala sa “comillas” gipahagsa gayud paglitok sa Kapitan Heneral ug sa tingog nga hataas.
—Si senyor don Juan Crisostomo Ibarra nagahulat sa mga sugo sa Kapitan Heneral!— matud sa usa ka luyo-luyo sa tingog nga makusog.
Si Maria Clara nalain.
—Ah!— miingon ang Kapitan Heneral— tugoti ako, inday, nga magpahayag sa akong tinguha sa pakigkita pag-usab kanimo una ako mogikan: aduna pay mga butang hinungdanon uyamut nga buut ko isulti kanimo. Ginoong Alkalde, ubanan mo ako unya sa usa ka lulinghayaw nga gihunahuna kong himuon, magalakaw lamang, human ang pakigsulti ko nga inusara kang ginoo Ibarra.
—Dagway ang Kapitan Heneral motugot nga among pahanumdoman— miingon si pari Salvi sa dakung pagpaubus— nga si ginoo Ibarra “excomulgado”...
Gipakgang sa Kapitan Heneral ang sulti sa pari ug miingon:
—Gikalipay kog daku nga wala kitay laing gikagul-an gawas sa kahimtang ni pari Damaso, ug sa “tinuoray” gipanghinaut ko nga “mahingpit ang iyang kaayohan”, kay tungud sa iyang kagulangon “usa ka panaw ngadto sa Espanya” kon masakiton kita dagway dili kaayo makapahimuot. Apan kini anaa da kaniya... Ug karon, nga hatagan unta kamo ni Bathala mga maayong lawas!
Silang tanan namauli.
—Tinuod man bitaw nga kana anaa da kaniya!— mibagulbol si pari Salvi sa paggula.
