mon, ubp., sumala sa bulok sa naasoy nang mga suga. Sa kabalayan dili sugdan pagpanagkut kining mga sugaà kon dili inig-agi na ni San Francisco; si San Juan Bautista wala pasidunggi niini, busà nagalagsik siya, naulaw nga siya da maoy bugtong nagasaput ug panit sa mananap taliwala sa daghan niyang mga kauban nga naputos sa bulawan ug mga batong mahal.
—Anaa ang among santas!-matud sa anak babaye sa "gobernadorcillo" sa iyang mga bisita;- gipahulaman ko kaniya ang akong mga singsing aron lamang ako mahilangít.
Ang nanagbitbit ug mga suga nanghunong duol sa intablado aron pagparnati sa "loa", ug ang mga santos nanghunong usab: sila kun ang nanagyayong kanila buút upod mamati ug mga balak. Diha nga gipangapuyan nág hulat, ang nanagpasan kang San Juan namungko ug nagkasabut nga ang santos ibutang nila sa yuta.
—Tingali unyag masuko ang "alguacil" milalis ang usa kanila.
—Saba na! Didto bitaw sa kristiya ipasók man lamang siya sa suók tipon sa mga lawá...
Ug sa diha na sa yuta, si San Juan nahisama na lamang intawon sa usa ka tawong timawa.
Sukad kang Santa Magdalena nagsugod ang panón sa mga babaye, ugaling kay inay mag-uná ang mga bata sama sa laray sa mga lalaki, ang mga tigulang maoy nanag-uná ug ngpaulahí ang laray sa mga dalaga nga wala mabugto hangtud sa "carro" sa Birhen sinunod sa kura nga gipandungan sa “palio”. Kining batasana nasunód kang pari Dámaso nga kanhi magkanayón: "Ang Birhen mahagugma sa mga batan-on ug dili sa mga tigulang", mga pulong makapakulima sa nawong sa mga biyata apan dili makapausab sa gusto sa Birhen.
Si San Diego nagasunod kang Magdalena, bisan daw wala siya mahamuót niini kay nagakusmod man gihapon sama ganina sa buntag nga nagasunód siya kang San Francisco. Unóm ka "Hermanas Terceras" maoy nanagguyod sa iyong "carro" tungud kay kini sila dagway adunay ambut unsang mga saaran kun balatian ka kaha nga wala pa gayud maayo: ang matuod mao nga sila nangusóg gayud intawon pagbutad sa "carro." Si San Diego mihunong tungód sa intablado ug nagahulat nga yukboan siya.
Apan kinahanglan nga hulaton una ang "carro" sa Birhen
